Frantsııada zeınetaqy reformasyna qarsy sherýge mıllıonnan astam adam qatysty

PARIJ. QazAqparat – Frantsııada úkimettiń zeınetkerlik jasyn 62-den 64-ke kóterý týraly sheshiminen týyndaǵan daǵdarys jalǵasyp jatyr. Beısenbidegi zeınetaqy reformasyna qarsy narazylyq aktsııalaryna búkil el boıynsha mıllıonnan astam adam qatysty. Eldiń ІІM málimetteri boıynsha, Parıjde júz myńnan astam demonstrant kóshege shyǵyp, polıtsııamen qaqtyǵystar bastaldy. Bordoda Mýnıtsıpalıtet ǵımaratynyń esigi órtendi, dep habarlaıdy QazAqparat VVS-ge silteme jasap.

El boıynsha tártipsizdikterge qatysy bar degen aıyppen 80 adam qamaýǵa alyndy, onyń 33-i Parıjde. Bul – Frantsııa prezıdenti Emmanýel Makron óte qajet dep sanaıtyn reformaǵa qarsy demonstratsııalardyń toǵyzynshy kúni.

Qańtarda qaraýǵa usynylyp, ótken aptada parlamenttiń daýysynsyz maquldanǵanǵan zań eldegi jaǵdaıdyń shıelenisýine ákeldi. Úkimet sheshiminiń kúshi senimsizdik votýmy arqyly ǵana joıylady. Biraq, dúısenbide el úkimeti parlamentte jarııalanǵan senimsizdik votýmyn jeti daýyspen eńserdi.

Frantsııanyń bas kásipodaǵy «Jalpyǵa ortaq eńbek konfederatsııasy» (CGT) málimetteri boıynsha, beısenbide Parıj kóshelerinde 800 myńǵa jýyq adam jınaldy. Alaıda polıtsııa málimetinshe, narazylyq aktsııasyn 119 myń adam shyqty.

Parıjdiń keıbir aýdandarynda tártipsizdikter jasaldy. Sherýshilerdiń shaǵyn toptary polıtsııaǵa tas laqtyryp, otshashý jaqty, tártip saqshylary kózden jas aǵyzatyn gaz qoldandy.

Bastılııa alańynan Parıj operasynyń ǵımaratyna deıingi sherý baǵytyndaǵy dúkender, meıramhanalar jáne basqa da mekemeler saqtyq maqsatynda aldyn ala qorshaldy. Jol boıynda polıtsııa qyzmetkerleri kóp boldy. Barlyǵy bes myńǵa jýyq tártip saqshysy jumyldyryldy.

Mundaı sherýler Frantsııanyń basqa qalalarynda da ótti. Eldiń batysyndaǵy Nant qalasynda da narazylyq bildirýshiler polıtsııa qyzmetkerlerine qatty zattar laqtyryp, qoqys jáshikterin órteýge kiriskende polıtsııa kózden jas aǵyzatyn gaz shashty.

Rende sý shashatyn qurylǵylar paıdalanyldy.

Nıtstsada sherýshiler áýejaı ǵımaraty mańynda blokada jasady.

Bordoda qalalyq ákimdiktiń esikteri órtengeni habarlandy. Olardy kim jáne qalaı órtegeni áli belgisiz. Órt jyldam sóndirildi.

Kásipodaqtar narazylyq aktsııalary sátti ótip jatyr dep esepteıdi, óıtkeni el turǵyndary prezıdent Makron men úkimetke óz oılaryn bildire aldy. Olar halyqty 28 naýryzda qaıtadan kóshege shyǵýǵa shaqyrdy.

Frantsııadaǵy sherý týraly tolyǵyraq QazAqparat sarapshysynyń materıalynda.