Frantsııada úshinshi lokdaýn engizý máselesi qarastyrylmaq
15 jeltoqsanda Frantsııa koronavırýstyń «ekinshi tolqyny» kezinde engizilgen shekteýlerdi jeńildetken bolatyn. Degenmen ınfektsııanyń kúndelikti jaǵdaılarynyń ortasha sany Frantsııa úkimeti belgilegen negizgi shekten tómendegen joq – táýligine 5 000 adam.
Rojdestvolyq merekesi kezinde koronavırýstyń jańa jaǵdaılarynyń sany edáýir tómendegenine qaramastan, úkimet bul sandar áli de naqty jaǵdaıdy kórsetpeıdi dep alańdaýda: 28 jeltoqsanda – 2 960, 27 jeltoqsanda – 8 822 jáne 26 jeltoqsanda – 3 093 naýqas.
Mereke kúnderi kóptegen COVID-19 testileý ortalyqtary jabyldy, aýrýdyń tómendeýi testileýden ótip jatqan adamdardyń azaıýyna baılanysty bolýy yqtımal.
Frantsııada burynǵydaı keshki 8-den tańǵy 6-ǵa deıin qatań komendanttyq saǵat belgilengen, degenmen 23 jeltoqsanda, ıaǵnı Rojdestvo qarsańynda jeńildik jasaldy.
Jeltoqsan aıynyń ortasynda azyq-túlik dúkenderine jatpaıtyn saýda oryndary qyzmet kórsetti, al meıramhana men kafelerdiń jumysy toqtatyldy. Kınoteatr men teatrlar sııaqty mádenı nysandar áli de jabyq.
Frantsııanyń Densaýlyq saqtaý mınıstri Olıve Veran úkimettiń «úshinshi lokdaýndy» joqqa shyǵarmaıtynyn aıtty.
«Biz halyqty qorǵaýǵa qajetti sharalardy qoldana beremiz. Alaıda bul bizdiń sheshim qabyldaǵanymyzdy bildirmeıdi, jaǵdaıdy saǵat saıyn baqylap otyrmyz», – dep naqtylady mınıstr O. Veran.
Keıbir frantsýz aımaqtary, ásirese eldiń shyǵysyndaǵy aımaqtar, basqalarǵa qaraǵanda kóbirek zardap shekti. Degenmen frantsýz úkimeti Jańa jylǵa deıin úshinshi lokdaýn týraly málimdeme jasamaıdy dep boljanady. Úkimet ulttyq emes, aımaqtyq turǵydan shekteýler qoıý týraly sheshim qabyldaýy múmkin.
Pandemııa bastalǵannan beri Frantsııada Covid-19-dan 63 000-nan astam ólim tirkeldi. Qazirgi ýaqytta Frantsııadaǵy jalpy naýqastar sany 2 562 646-ny quraıdy, bul – álemdegi besinshi kórsetkish.
Avtory Arnur Raqymbekov