Frantsııada sot otyrysyna kelmegen Muhtar Áblıazovqa aıyppul salyndy
BTA banktiń resmı saıtyndaǵy málimetke súıensek, Frantsııa soty Muhtar Áblıazovtyń sot otyrysyna kelmeýin saıası qýǵynǵa ushyraýymen baılanystyrǵan ýájin qabyldaýdan bas tartqan.
«Ol 2021 jyldyń 15 jáne 16 maýsymynda Eks an Provans qalasyndaǵy sotqa kelip, jaýap berýi kerek bolǵan. Sońǵy sátte Áblıazov óz advokaty arqyly saıası qýǵynnan saqtanǵandyqtan frantsııalyq sottyń nusqaýymen júrgisi kelmeıtinin málimdegen. Keıin BTA Áblıazovqa sotqa kelmegeni úshin aıyppul salý jóninde usynym hat joldaǵan. Apellıatsııa soty onyń 2018 jyly da osyǵan uqsas shaqyrýǵa kelmegenin anyqtady. Sondaı-aq, Áblıazov áýeli Anglııada bosqyn mártebesinen aıyryldy. Keıin Frantsııada da osyndaı mártebeden aıyryldy. Sondyqtan ol sotqa kelmeýine bosqyn mártebesin syltaý retinde qoldana almaıtyn», - dep jazylǵan BTA bank málimetinde.
Bank málimetinshe, buǵan deıin tergeý sýdıasy Áblıazovqa sot baqylaýy sharasyn taǵaıyndap, talap boıynsha sotqa kelýge mindettegen.
Muhtar Áblıazov sol talapty buzyp, Eks an Provans qalasy sotynyń shaqyrýyn oryndamaǵan.
7 naýryzda Eks an Provans qalasynyń apellıatsııa soty Muhtar Áblıazov sottyń kelý talabyn oryndamaǵanyn rastaǵan sheshim shyǵardy.
Osyǵan baılanysty oǵan aıyppul salyndy.
«BTA Banki frantsýz sotynyń ádil sheshimin quptaıdy. Muhtar Áblıazov pen onyń sybaılastary birneshe ret sot protsesine qatysýdan bas tartyp, kóptegen sot sheshimderin, sonyń ishinde AQSh-ta da buzdy. Ol úshin jaýapqa tartylyp, aıyppul arqalady», - delingen resmı málimette.