Frantsııada prezıdent saılaýynyń birinshi týry ótip jatyr

PARIJ. QazAqparat – Frantsııada búgin prezıdent saılaýy ótip jatyr. Saılaý ýchaskeleri jergilikti ýaqyt boıynsha 8-den 19-ǵa deıin ashyq. 49 mln frantsýz daýys bere alady, dep habarlaıdy QazAqparat Deutsche Welle agenttigine silteme jasap.

Qoǵamdyq pikir saýalnamasy prezıdent saılaýynda qazirgi Memleket basshysy Emmanıýel Makron men «Ulttyq birlestik» partııasynyń ókili Marın Le Penniń qoldaýǵa ıe ekenin aıtyp jatyr.

2017 jyly eki saıasatker de saılaýdyń ekinshi kezeńine shyqqan edi. Le Pen Makronnan eki esege qalyp qoıdy (33,9 jáne 66,1 protsent daýys).

Olarǵa ońshyl radıkaldy burynǵy pýblıtsıst, «Rekonkısta» qozǵalysynyń jetekshisi Erık Zemmýr, ortalyq-ońshyl «Respýblıkashyldar» partııasynyń kandıdaty Valerı Pekress, «Baǵynbaǵan Frantsııa» solshyl partııasynyń jetekshisi Jan-Lıýk Melanshon, «Eýropa - Ekologııa – «Jasyldar» partııasynyń ókili ıAnnık Jado, sondaı-aq Parıj meri Frantsýz Sotsıalıstik partııasynan Anna Hıdalgo básekeles bolyp otyr.

Frantsııa prezıdenti 5 jylǵa saılanady. Eger kandıdattardyń birde-biri birinshi týrda absolıýttik kópshilik daýysqa ıe bolmasa, onda eń kóp daýys jınaǵan eki kandıdattyń arasynda ekinshi týr ótkiziledi. Memleket basshysy laýazymyn qatarynan eki merzimnen artyq atqarýǵa bolmaıdy.

Osyǵan deıin Frantsııada Naýryz merekesi toılanǵanyn jazǵan edik.