Frantsııada oıyn alańynda balalardy pyshaqtap tastaǵan bosqyn qamaýǵa alyndy

ASTANA. QazAqparat - Frantsııanyń Ansı qalasynda tórt kishkentaı bala men eki eresek adamdy pyshaqtady degen er adamǵa aıyp taǵyldy. Qamaýda otyrǵan kúdikti tergeýshilerdiń suraǵyna jaýap bergisi kelmedi, dep habarlaıdy QazAqparat Euronews-ke silteme jasap.

Onyń Shvetsııa turǵyny - 31 jastaǵy sırııalyq bosqyn ekeni anyqtaldy.

Aty-jóni jarııalanǵan joq. Belgilisi - áıeli men úsh jasar qyzy bar.

Qaıǵyly oqıǵa juma kúni tańerteń kól jaǵasyndaǵy balalar alańynda boldy. Shabýyldyń sebebi belgisiz.

«Ansı prokýratýrasy «kisi óltirýge oqtalý» jáne «qarýly shabýyl» faktileri boıynsha sot tergeýin bastady. Іsti júrgizýge Ansıdiń eki tergeý sýdıasy tartyldy. Kúdiktini sotqa deıingi qamaýǵa alý týraly ótinish bildirdi. Búgin tańerteń ol aıyp taqqan tergeý sýdıalaryna jiberildi. Aıyptalýshy olarmen sóılesýden bas tartty»,- deıdi Ansı prokýrory Lın Bonne-Matıs.

Prokýrordyń aıtýynsha, zardap shekkenderdiń ómirine tóngen qaýip joq, olardyń arasynda Frantsııa, Ulybrıtanııa, Nıderland jáne Portýgalııa azamattary da bar.

Frantsııa prezıdenti Makron jubaıymen birge Ansıge jáne Grenobldegi jaralylar jatqan aýrýhanaǵa bardy.

Ol sondaı-aq qaskúnemge qarsylyq kórsetip, kedergi jasaǵan Anrı esimdi jas jigitpen kezdesti.

Buǵan deıin Frantsııa saıabaǵynda alty adam pyshaq jaraqatynan zardap shekkenin habarlaǵan bolatynbyz.