Frantsııada Naýryz merekesi uıymdastyryldy

NUR-SULTAN. QazAqparat - Túrkııa qazaqtarynyń Frantsııadaǵy qaýymdastyǵy Qazaqstannyń Frantsııadaǵy Elshiligi men Garj-le-Gonnes qalasy ákimshiliginiń qoldaýymen Naýryz merekesin toılady, dep habarlaıdy QazAqparat.

QR Syrtqy ister mınıstrliginiń baspasóz qyzmeti taratqan derkterge qaraǵanda, merekege Eýropadaǵy qazaqtar qoǵamynyń tóraǵalary, sonymen qatar Frantsııada turatyn qandastarymyz qatysty.

Kúnniń shýaǵy men dostyqqa toly bul kúnde fýtboldan týrnır ótti. Odan keıin Frantsııadaǵy Qorqyt-Abaı qazaq mádenı ortalyǵynyń ókilderi men daryndy qandastarymyz sahnada qazaq mýzykasyn, ánin jáne bıin usyndy. Kishkentaı búldirshinder úshin arqan tartý, asyq atý jáne toǵyzqumalaq dástúrli oıyndary uıymdastyryldy.

Merekege oraı ornatylǵan kıiz úıde qonaqtar naýryz kójeden jáne qazaqtyń basqa da ulttyq taǵamdarynan dám tatty. Sonymen qatar, uly aqyn Abaıdyń shyǵarmalarynyń frantsýz tiline aýdarylǵan jınaqtary taratyldy.