Frantsııada múgedekterge arnalǵan demalys úıi órtendi, 11 adamnyń qaza bolǵany aıtylýda

ASTANA. QazAqparat – Frantsııada múmkindigi shekteýli adamdarǵa arnalǵan demalys úıinen órt shyǵyp, boljam boıynsha 11 adam qaza boldy. Bul týraly QazAqparat Euronews-ke silteme jasap habarlaıdy.

Frantsııa bıligi órtten 11 eresek adam «kóz jumǵan bolýy múmkin» dep málimdedi.

Eldiń ishki ister mınıstri Jerald Darmanen Twitter-de búgin tańerteń Germanııa shekarasyna jaqyn ornalasqan Vıntsenhaım shaǵyn qalasyndaǵy múgedekterge arnalǵan mekemede órt shyqqanyn jazdy.

«Ókinishke qaraı, qaza bolǵandar bar», - dedi ol.

Joǵarǵy Reın aımaǵynyń jergilikti ákimshiligi órt Vıntsenhaımdaǵy múmkindigi shekteýli jandar demalatyn jeke úıde tańǵy saǵat 6:30-da bastalǵanyn málim etti. 17 adam evakýatsııalandy, 1 adam aýrýhanaǵa jetkizildi.

Oqıǵa ornyna Frantsııanyń premer-mınıstri Elızabet Born shyqty.