Frantsııada koronavırýs juqtyrǵandar sany 1 mıllıonnan asty

PARIJ. QazAqparat – Sońǵy 24 saǵatta Frantsııada koronavırýs ınfektsııasyna shaldyǵýdyń 42 032 jańa oqıǵasy tirkeldi. Osylaısha, pandemııa bastalǵannan beri el boıynsha COVID-19 juqtyrǵan adamdar sany bir mıllıonnan asty, dep habarlaıdy QazAqparat France24.com-ǵa silteme jasap.

Sarapshylar indet juqtyrý oqıǵalarynyń shynaıy sany Frantsııanyń densaýlyq saqtaý organdary tirkegen 1 041 075 adamnan áldeqaıda kóp bolýy múmkin dep sanaıdy. Buǵan pandemııanyń erte kezeńinde testilerdiń bolmaýy, aýrýdyń sımptomsyz ótýi jáne ózge de problemalar sebep.

France24.com saıtynyń jazýynsha, Frantsııa Batys Eýropada COVID-19 juqtyrý oqıǵalarynyń osynshama úlken sany tirkelgen Ispanııadan keıingi ekinshi el bolyp otyr.

Eýropanyń basqa elderinde sııaqty, Frantsııada sońǵy aptalarda koronavırýstyń ekinshi tolqynynda táýlik ishinde vırýs juqtyrý oqıǵalarynyń sany kúrt artqan. Qazirgi kezde COVID-19 juqtyrǵan patsıentter qarqyndy terapııa bólimderinde búkil el boıynsha 42 paıyz oryndy alyp jatyr, al Parıj aımaǵynda bul kórsetkish 64 paıyzdy quraǵan.

Frantsııa ulttyq densaýlyq saqtaý agenttiginiń málimetinshe, sońǵy aptada elde COVID-19 vırýsyn juqtyrǵan 11 myń patsıent aýrýhanaǵa jatqyzyldy. Sonyń ishinde 1 714 adam – qarqyndy terapııa bólimderinde.

Juma kúni Parıj qalasy mańyndaǵy aýrýhanalardyń birine barǵannan keıin Frantsııa prezıdenti Emmanıýel Makron «epıdemııa jyldam órship kele jatqanyn» málimdedi.

Frantsııa úkimeti ótken aptada eldiń segiz qalasynda komendanttyq saǵat engizdi. Odan keıin komendanttyq saǵat taǵy 38 aımaq pen frantsııalyq Polınezııada da jarııalandy. Elde keshki saǵat 9-dan tańǵy saǵat 6-ǵa deıin jalǵasatyn komendanttyq saǵat jáne densaýlyq saqtaý maqsatyndaǵy ózge de sharalar «alty aptadan kem emes ýaqytqa» sozylady, dep qosyp ótti Makron.

France24.com Frantsııada koronavırýs ınfektsııasymen baılanysty 34 myńnan astam ólim oqıǵasy tirkelgenin jáne bul Eýropadaǵy eń joǵary kórsetkishterdiń biri ekenin eske saldy.