Frantsııada bilgisiz bireý adamdarǵa pyshaqpen shabýyldap, 2 adamdy mert qyldy

NUR-SULTAN. QazAqparat - Frantsııanyń ońtústik-shyǵysyndaǵy Roman-sıýr-Izer qalasynda bolǵan shabýyldan eki adam qaza taýyp, bes adam jaralandy, dep habarlaıdy QazAqparat VVS-ge silteme jasap.

Qala meriniń aıtýynsha, er adam pyshaqpen shabýyl jasaǵan sátte azamattardyń barlyǵy dúkenniń kireberisinde kezekte turǵan. Jaralanǵandardyń biriniń jaǵdaıy aýyr.

Polıtsııa kúdiktini ustady, frantsýz basylymdarynyń sıpattaýynsha, ol 33 jastaǵy sýdandyq azamat.

France Bleu saıtynyń dereginshe, bul adam polıtsııaǵa nemese barlaý qyzmetine tanys emes edi.

Qylmystyń sebebi ázirgi belgisiz, biraq oqıǵa ornyn kórip kelgen eldiń Іshki ister mınıstri Krıstof Kastaner «Búgin bir adam terrorıstik jolǵa tústi», dep málimdedi.

Kúdiktiniń sybaılastary bar-joǵyn ulttyq kontrterrorıstik prokýratýra anyqtaıdy, dep tolyqtyrdy mınıstr.

Frantsııada koronavırýs epıdemııasyna baılanysty karantın jarııalandy. Adamdar úıden tek azyq-túlik pen dári-dármek alýǵa nemese taza aýa jutýǵa ǵana shyǵa alady.