Frantsııa zeınetaqy reformasy týraly zańdy daýysqa salmastan qabyldady

ASTANA. QazAqparat – Frantsııa premer-mınıstri Elızabet Born zeınetaqy júıesine ózgerister engizý týraly zań jobasynyń parlamentte daýysqa salynbastan qabyldanǵanyn málimdedi, dep habarlaıdy QazAqparat Euronews-ke silteme jasap.

«Parlament komıtetteri arasynda qol jetkizilgen ymyrany táýekelge tige almaımyz. Biz zeınetaqy júıesiniń bolashaǵymen oınaı almaımyz, reforma qajet», - dedi Elızabet Born Ulttyq assambleıa depýtattary aldynda sóılegen sózinde.

Onyń aıtýynsha, konstıtýtsııanyń 49-babynyń 3-tarmaǵyna sáıkes, zeınetkerlik jasyn 62-den 64-ke deıin ulǵaıtýdy kózdeıtin zań jobasy úshin bar jaýapkershilikti úkimet óz moınyna alady.

Eske salaıyq, Frantsııada uzaq ýaqyt boıy zeınetaqy reformasyna qarsy aýqymdy narazylyq sharalary ótti. El boıynsha mıllıonǵa jýyq adam, sonyń ishinde bir ǵana Parıjde 300 myń adam kóshege shyqty.

Saýalnamalarǵa sáıkes, Frantsııa turǵyndarynyń 76%-y reformaǵa qarsy bolǵanymen, el boıynsha myńdaǵan narazylyqtarǵa qaramastan, Frantsııa senaty daýly reformany qoldady.