Frantsııa men Qazaqstannyń prezıdenttik ınstıtýttary uqsas – Fılıpp Martıne
«Bizdiń álem teńdessiz daǵdarysty bastan ótkerip jatyr. Pandemııa álemdi myqtap turyp tutqynyna aldy. Bizdiń elderimiz vırýspen kúres júrgizip jatyr. Osynaý daǵdarystyń ekonomıkalyq saldarynyń tolyq aýqymyn eseptep bilýdiń ózi múmkin emes. Keıingi kezde munaı baǵasynyń qatty quldyraýyna kýá bolyp otyrmyz», - dedi Fılıpp Martıne «Prezıdenttik basqarý nysany. Konstıtýtsııalyq negiz jáne saıası tájirıbe» atty halyqaralyq onlaın-konferentsııada.
Elshiniń aıtýynsha, búkil álemde tıimdi vaktsına bolmasa, adamzattyń alǵa jyljýynyń ózi úlken máselege aınalyp otyr.
«Osynaý daǵdarys kezeńinde epıdemııaǵa qarsy kúresý úshin bizge barynsha halyqaralyq yntymaqtastyq kerek. Bizge Dúnıejúzilik densaýlyq saqtaý uıymy sekildi qarjylandyrylǵan jáne jan-jaqty qyzmet kórsete alatyn uıymdar qajet. Eń álsiz elderge kómek berilip, EO sekildi uıymdarda pikirlestik bolýy tıis. Frantsııa ekonomıkany jandandyratyn tıimdi sharalardy qolǵa alýǵa shaqyryp otyr. Eýropa men Azııa osyndaıda nıettestik bildirýi kerek. Frantsııa men Qazaqstandy biriktirip turǵan strategııalyq yntymaqtastyq bizdiń jumysymyzdyń basymdyqqa ıe baǵyttarynyń biri bolyp qala beredi. Osynaý baǵyt-baǵdar qajettigin joǵaltpaý úshin bizge myqty ulttyq ınstıtýttar qajet. Qazaqstan men Frantsııanyń prezıdenttik ınstıtýttary uqsas. Ol týraly bári jaqsy biledi», - dedi ol.