Frantsııa Qytaıdan kelgen azamattardan COVID-19 synamasyn alady

ASTANA. QazAqparat - Jeksenbiden bastap Frantsııaǵa barǵysy keletin Qytaı saıahatshylary hırýrgııalyq betperde kıip, kelgen kezde kezdeısoq PTR testin tapsyrýǵa daıyn bolýy tıis. Beısenbiden bastap olar, sondaı-aq, ushýǵa 48 saǵattan az ýaqyt qalǵanda PTR nemese antıgen usynýy shart. Sharalar ázirge 31 qańtarǵa deıin engizildi, dep habarlaıdy QazAqparat Euronews-ke silteme jasap.

«Kelý kezindegi bul baqylaý azamattardyń bizdiń aýmaqqa kirýine jol bermeý úshin jasalǵan baqylaý emes, bul ártúrli nusqalardy dál qadaǵalaýǵa múmkindik beretin ǵylymı kózqaras. Qazir bul negizinen Qytaıda keń taralǵan omıkron shtamy úshin jasalyp jatyr», - deıdi Frantsııanyń densaýlyq saqtaý mınıstri Fransýa Bron.

Frantsııa bul sharalardy Ulybrıtanııa, Italııa nemese AQSh sııaqty jeltoqsan basynda shekteý sharalaryn alyp tastaǵan Qytaıdaǵy koronavırýs juqtyrý jaǵdaılarynyń órshýine baılanysty qabyldady.

Apta saıyn Qytaıdan Frantsııaǵa 6 reıs jáne Gonkongtan 10 reıs keledi. Olardyń kópshiligi Parıjdegi Rýassı-Sharl de Goll áýejaıyna qonady. Saıahatshylardy aldymen 2E termınalynda tekseris ortalyǵyndaǵy agentter anyqtaıdy. Eger test oń bolsa, olar 7 kún boıy oqshaýlanýǵa májbúr bolady.

Bul qadam Dúnıejúzilik densaýlyq saqtaý uıymynyń basshysy Tedros Adhanom Gebreıesýs Qytaıdaǵy ınfektsııalar sanynyń ósýine alańdaýshylyq bildirip, qosymsha aqparatty jarııalaýǵa shaqyrǵannan keıin jasaldy.