Frantsııa fýtbol federatsııasy prezıdentiniń Zınedın Zıdanǵa qatysty sózinen daý shyqty
Le Gre uzaq ýaqyt boıy Frantsııa quramasynyń bas bapkerligine úmitker bolyp eseptelgen ataqty fýtbolshy Zınedın Zıdanǵa qatysty pikir bildirgen.
Zınedın Zıdannyń Brazılııa quramasynyń tizginin ustaýy múmkin degen aqparatqa oraı Le Gre: «Zıdannyń Brazılııa quramasyna basshylyq etýi múmkin be? Maǵan báribir! Eger ol menimen baılanysqa shyqpaq bolyp áreket jasasa she? Bul esh múmkin emes, men onyń tipti qońyraýyna jaýap bermes edim», degen.
Le Greniń sózine aldymen Frantsııa quramasynyń shabýylshysy Kılıan Mbappe jaýap berdi.
«Zıdan degenimiz – Frantsııa, mundaı ańyzǵa aınalǵan oıynshyny syılamaý orynsyz», dep jazdy ol óziniń áleýmettik jelidegi paraqshasynda.
Z.Zıdan bapker esebinde de úlken tabystarǵa qol jetkizdi. Onyń basshylyǵymen «Real» (Madrıd) klýby qatarynan úsh ret Chempıondar lıgasynda úzdik shyqty, eki ret Ispanııa jeńimpazy atandy. 2021 jyldyń 27 mamyrynda ol madrıdtik klýbtan ketken bolatyn.
«Real» klýby da únsiz qalmaı, Frantsııa fýtbol federatsııasynyń prezıdenti Noel Le Greniń álemdik sport juldyzdarynyń biri Zınedın Zıdanǵa qatysty sózine oraı qynjylys bildirdi.
«Eliniń namysyn qorǵap, álem jáne Eýropa chempıony atanyp, basqa da kóptegen tabystarǵa qol jetkizgen Zınedın Zıdan búkil sporttyq mansabynda oıynshy esebinde de, bapker esebinde de ózin tanyta bildi. FFF prezıdentiniń málimdemesi onyń atqaryp otyrǵan qyzmetine saı kelmeıdi. Ol bizdiń komandanyń kapıtany, «Altyn dop» ıegeri, 2021 jyly Frantsııa quramasymen birge Ulttar lıgasynyń chempıony, bes dúrkin Chempıondar lıgasynyń jeńimpazy atanǵan, basqa da ataqtary bar Karım Benzemaǵa qatysty da sondaı pikir bildirgen bolatyn», delingen «Realdyń» resmı málimdemesinde.
L'Equipe basylymynyń habarlaýynsha, Zınedın Zıdan Le Greniń sózine jaýap berýdi josparlap otyrǵan joq.
Eske sala keteıik, budan buryn Dıde Deshamnyń Frantsııa quramasyn 2026 jylǵa deıin jattyqtyratynyn jazǵan edik.
Foto: GETTY IMAGES