Frantsııa Botaı mádenıetin moıyndap otyr - Saýytbek Ábdirahmanov
«Jylqy alǵash ret Botaı jerinde qolǵa úıretildi. Atalǵan fakt ǵylymı turǵyda dáleldengen. Biraq jylqynyń alǵash ret qaı jerde qolǵa úıretilgenine qatysty uzaq jyldar boıy daý-damaılar boldy. Búginde bul máselege núkte qoıyldy deýge bolady. Máselen, byltyr men Parıjde boldym. Ol jaqta meniń ulym jumys isteıdi. Eıfel munarasy janynda adam tarıhy mýzeıi bar eken. Meni soǵan alyp bardy. Biraq neni kórsetetinin aıtqan joq. Sóıtse, ol jerde domalaq bir zal bar. Onda adamzattyń eń mańyzdy degen 10 jańalyǵy kórsetilgen. Sonyń ishinde jylqyny qolǵa úıretý de bar. Al Botaı mádenıeti jylqyny alǵash ret qolǵan úıretilgen jer dep frantsýz tilinde jazylǵan», - dedi S.Ábdirahmanov Astanada ótken jıynda.
Depýtat frantsýz tilindegi jazýdyń aýdarmasyn da oqyp berdi. Ol jerdegi stendte bylaı jazylǵan: «Botaı mádenıeti Ortalyq Azııanyń dala men alqaptarynyń qıylysynda ornalasqan. Dál osy jerde bizdiń eramyzǵa deıingi IV myńjyldyqta adam alǵash ret jylqyny qolǵa úıretti. Ol jerdegi adamdar jartylaı kóshpeli sharýashylyqty júrgizdi. Sonyń izderi kólderdiń aınalasynan tabylǵan. Olardyń aǵash lashyqtary sol kezdegi Eýropa úılerine uqsaıdy. Al oıý-órnegi bar keramıkany neolıtke deıin qoldandy. Shaǵyn tas saımandary da boldy». S.Ábdirahmanovtyń aıtýynsha, Parıjdiń qaq ortasynda turǵan atalǵan jazýdyń ózi álemniń Botaı mádenıetin moıyndap otyrǵanyn kórsetse kerek.
«Botaı mádenıetin Vıktor Zaıbert ashty. Negizi, ataýy basqasha atalyp ketýi de múmkin edi. Máselen, Botaı mádenıeti emes, Nıkolskıı mádenıeti delinýi de múmkin edi. Óıtkeni, ózenniń arǵy jaǵynda Nıkolskıı degen shaǵyn aýyl bar. Biraq Zaıbert óte aqyldy adam bolǵan. Qazaqstandaǵy jańalyǵyn Nıkolskıı mádenıeti dep atasa, ony basqa jerlermen shatastyrýy ábden múmkin. Óıtkeni Nıkolskıı mádenıeti Tývada, ıAkýtııada nemese Mýrmanskide bolýy yqtımal. Sondyqtan ǵalym jaqyn jatqan Nıkolskııdi emes, Botaı aýylynyń ataýyn aldy. Botaı degen kisi Abylaı hannyń kezinde úlken batyr bolǵan», - dep atap kórsetti S.Ábdirahmanov.