Fotojýrnalıst Merkidegi balbaldardy memleket qamqorlyǵyna alýdy usyndy

ASTANA. QazAqparat – Belgili fotojýrnalıst Sergeı Alekseenok Merkidegi búlingen balbal tastardyń sýretin salyp, másele kótergen bolatyn. QazAqparat tilshisi máseleniń mán-jaıyn foto avtorynyń ózinen bilip kórdi.

«Balbaldardyń keıbirine joıylý qaýpi tónip tur. Qurtylyp, synyqtary shashylyp jatqan birneshe balbaldy alǵash ınternetten kórgen bolatynmyn. Internetti aqtaryp júrip sondaı úsh balbaldy taýyp aldym. Bireýi ǵana bútin eken. Onyń janynda basy julynǵan eki balbal jatty.

Joly qıyn bolǵandyqtan kóp adam bul jerdi bile bermeıdi. Merki kóne ǵıbadathana retinde tirkelgendikten memlekettik eskertkish bolyp esepteledi. Bul jerde ǵalymdar qazba jumystaryn júrgizgen sııaqty. Keıin aıaqtalmaı qalǵandaı. Munda alǵash ret byltyr bolǵanmyn. «Petroglıf izdeýshiler» uıymynyń jetekshisi Olga Gýmırova Astanaǵa baryp, shatqaldy qorǵaý máselesin Májilis qabyrǵasynda kóterdi. Endi Almatyǵa baryp, osy máselenmen aınalysamyn», - deıdi fotojýrnalıst.

Onyń aıtýynsha, balbaldardy kim qıratqany, qashan qıratqany belgisiz.

«Bireýler balbaldardy qazyp alyp, murajaıǵa qoıý kerek deıdi. Biraq balbaldyń orny – tabıǵat. Al japan túzde olardyń árbirine kúzetshi bekitip qoıý taǵy múmkin emes. Jyl saıyn sanaq jasap, qadaǵalap, kartasyn jasaý eń ońtaıly joly shyǵar. Aıyna bir ret baryp, baqylap otyrýǵa qarajat kerek. Biraq eskertkish oǵan turarlyq. Týrıstik oryn retinde damytýdyń reti kelmeıtin sııaqty. Óıtken tumsa tabıǵat adam aıaǵy tımesten saqtalsa, durys edi», - deıdi Sergeı Alekseenok.

Qazaq Geografııalyq qoǵamynyń saıtyndaǵy málimetke súıensek, Merki qoryǵyndaǵy balbaldar ıÝNESKO-nyń Búkilálemdik mura tizimine engizilgen. Arheologtar Merke ǵıbadathanasyn bizdiń zamanymyzdyń VI ǵasyryna jatqyzady. Ol kezde biryńǵaı túrki qaǵanatynyń ortalyǵy bolǵan. Vızantııa elshileri ejelgi Tarazda Estemı qaǵannyń ordasy bolǵanyn, al taýda dinı rásim ótkizetin oryndar bolǵanyn jazyp qaldyrǵan.

Foto: Sergeı Alekseenok