Fotoreportaj: Almatynyń kıeli nysandary qaıta jańǵyrdy

ALMATY. QazAqparat - Almatyda «Rýhanı jańǵyrý» baǵdarlamasy bastalǵaly beri 2 jylda birqatar kıeli nysandar óz kelbetterin ózgertip, jańǵyrtý sharalarynan ótti, dep habarlaıdy QazAqparat tilshisi.

Atap aıtqanda, ólkeniń tarıhy men mádenıetin keńirek nasıhattaý maqsatynda arheologııalyq, etnografııalyq nysandardy jańǵyrtýǵa basymdyq berildi.

Almatyda respýblıkalyq mańyzy bar 6 kıeli nysan bar.

Olardyń qatarynda «Boraldaı saq qorǵandary», Raıymbek batyr mavzoleıi, «Táýelsizdik» monýmenti «Táýelsizdik tańy», Ahmet Baıtursynov murajaı úıi, Voznesensk kafedraly shirkeýi, burynǵy Úkimet úıi (Qazaq Brıtan Tehnıkalyq ýnıversıtetiniń ǵımaraty).

Jergilikti mańyzy bar kıeli nysandar qatarynda Medeý muz aıdyny, Kóktóbe, Shymbulaq, burynǵy Vernyı balalar úıiniń ǵımaraty (qazirgi Almaty mýzeıi), 1931-1933 jyldardaǵy ashtyq qurbandary eskertkishi, QR Ǵylym ordasy, Ortalyq zırat jáne Keńsaı, Muhtar Áýezovtiń, Dinmuhammed Qonaevtyń mýzeı-úıi bar.

2017 jyly Raıymbek batyr mavzoleıinde ǵylymı restavratsııalyq jumystar júzege asyryldy. Budan bólek mavzoleıdiń qasyna memorıaldy mýzeı kesheni, mýzeı, meshit salynady. Aýmaqty geologııalyq zertteý jumystary júrgizildi. Jobany júzege asyrýdyń sáýlet josparlaý tapsyrysy alyndy. Eskızdik joba bekitildi. Qazir jobalyq-smetalyq qujattama jasalyp jatyr.

2018 jyly Boraldaı saq qorǵany terrıtorııasynda park quryldy. Munda saq dáýirinde bolǵan adamdy jerleý rásimderinen syr shertetin qorǵan, saq turǵyn jaıynyń maketi kórsetilgen. Osy Boraldaı saq qorǵandaryn saqtap, damytý maqsatynda, ıÝNESKO muralarynyń tizimine alyný jáne týrısterdi tartý úshin 430 gektar aýmaqta Saq mádenıetiniń ortalyǵy ashylady. Munda restavratsııalyq sheberhana, konferentsııa jáne mýltımedıa zaldary paıda bolady.

Odan bólek Voznesensk shirkeýi tolyq restavratsııadan ótkizildi. Osy maqsatta demeýshiler 504 mln teńge kóleminde qarjy bóldi.

Nysannyń syrtqy kelbeti jańaryp qana qoımaı, ishki kelbeti, qabyrǵalary qaıta boıaldy. Aınalasy abattandyrylyp, kógaldandyryldy.

Jóndeý jumystary mamyr aıynda tolyq bitedi.

Qalanyń týrıstik tartymdylyǵyn arttyrý maqsatynda VisitAlmaty týrıstik ortalyǵy ashyldy. Bul ortalyq 1904 jyly salynǵan (burynǵy shirkeý úıi) ǵımaratta ornalasqan.