Forvardtyq satyp alý avanstary qaıta qaralýy múmkin – QR AShM
Bul týraly QR Aýyl sharýashylyǵy mınıstri Erbol Qarashókeev Úkimet otyrysynda aıtty.
«Mınıstrlik óz tarapynan fermerler qaýymymen birlesip agroónerkásiptik keshendi memlekettik qoldaý tásildemelerin qaıta qaraý jumysyn jalǵastyrady, sondaı-aq memlekettik sýbsıdııalaýdyń jańa biryńǵaı aqparattyq júıesin engizý jumysyn jedeldetedi. Qazir ol Aqmola oblysynda testileýden ótip jatyr. Ony ekinshi jartyjyldyqtan bastap engizýdi josparlap otyrmyz», - dedi Erbol Qarashókeev.
Sondaı-aq, ol óńirlerdiń aýyl sharýashylyǵy ónimderin memlekettik turaqtandyrý qorlaryna forvardtyq baǵamen satyp alý máselesin zerdeleý bastalǵanyn málim etti.
«Munda turaqtandyrý qorlaryn qalyptastyrýǵa bólingen qarajattyń bir bóligin kúzgi satyp alýdan forvardtyq kelisimsharttardyń kóktemgi avanstaryna qaıta baǵyttaý josparlanýda. Osy maqsatta oblystar ákimdikterine otandyq taýar óndirýshilermen, óńdeýshi kásiporyndarmen forvardtyq kelisimsharttar jasasý jumysyn jandandyrý tapsyryldy. Sonymen qatar biz qoldanystaǵy turaqtandyrý qorlaryn qalyptastyrý qaǵıdalaryna qajetti ózgerister men tolyqtyrýlardy jedeldetip engizý jumysyn júrgizýdemiz», - dedi vedomstvo basshysy.