«Forbes: Qazaqstannan áketken qarjysyna Hrapýnov otelder men vıllalar satyp alyp jatyr» - respýblıkalyq basylymdarǵa sholý
***
«Egemen Qazaqstan» basylymynyń jazýynsha, keshe Bas Prokýror Ashat Daýylbaevtyń tóraǵalyq etýimen Bas prokýratýranyń alqa májilisi bolyp ótti. Onda qylmystyq protsestegi qadaǵalaý jaı-kúıi jáne azamattyq talap aryzdardy qaraý tájirıbesi, sondaı-aq uıymdasqan qylmys, sonyń ishinde, esirtki bıznesi salasyndaǵy qylmystylyqqa qarsy kúres tıimdiligin arttyrý máseleleri qaraldy. Alqa jumysyna Іshki ister mınıstrligi, Ulttyq qaýipsizdik komıteti, Ekonomıkalyq qylmysqa jáne sybaılas jemqorlyqqa qarsy kúres agenttigi, Qarjy mınıstrliginiń Kedendik baqylaý komıtetiniń basshylary men qyzmetkerleri, beınekonferentsııalyq baılanys arqyly oblys prokýrorlary men óńirlik quqyq qorǵaý organdarynyń basshylary qatysty. Bas prokýratýra júrgizgen taldaý kórsetkendeı, memlekettik organdar óz áleýetterin tolyqqandy paıdalana almaı otyr. Jasalǵan qylmystary úshin jazanyń bolatyny týraly máseleni qarastyra otyryp, japa shegýshilerdiń buzylǵan quqyqtary men múddelerin qalpyna keltirý jáne múliktik zalaldyń ornyn toltyrý máselelerine qajetti deńgeıde nazar aýdarylmaıdy. Maqala «Qylmyspen kúreste tıimdilik qajet» degen taqyryppen berilip otyr.
Osy basylymda «Forbes: Qazaqstannan áketken qarjysyna Hrapýnov otelder men vıllalar satyp alyp jatyr» degen maqala jarııalandy. «Qazaqstannan qashyp ketken Vıktor Hrapýnov pen onyń otbasynyń Shveıtsarııa olıgarhtarynyń arasynda baılyq jóninen birte-birte joǵary kóterile túskeni týraly habarlar bizdiń elimizge dúrkin-dúrkin jetý ústinde. Osy taqyrypta qalam terbegen otandyq jýrnalıster: «Bizdiń adamdar Shveıtsarııada da kózge túsýde» degen sózdi mysqylmen jazatyn boldy. Degenmen, bul sózdiń aşy bolsa da shyndyǵyn Hrapýnovtar otbasy ýaqyt ótken saıyn dáleldep keledi. Olar tipti, ózderiniń jyljıtyn-jyljymaıtyn múlikterdi satyp alý qarqynymen shveıtsarııalyq qoǵamdy tań qaldyrýda. Almatynyń burynǵy ákimi V.Hrapýnovtyń qarjyny ońdy-soldy shashyp jatqandyǵy týraly eýropalyqtardyń pikiri qazir Qazaqstanǵa da jetip otyr»,-dep jazady gazet.
***
«Alash aınasy» gazetiniń búgingi sanyndaǵy Dat aıdarynda kólemdi suhbat bergen belgili ekonomıst maman Serik Jumanǵarın monoqalalardy damytýǵa bólingen qarajat olardy 90 paıyzǵa jańǵyrtýy tıis dep esepteıdi. Mamannyń pikirinshe memlekettiń shaǵyn qalalardy damytý josparynyń júzege asa bastaýy el ekonomıkasynyń ilgerileı bastaýynyń kórsetkishi.
«Alash aınasynyń» oı-kókpar aıdarynda «Memlekettik bilimge qarjy jınaqtaý júıesi ata-analar men tálimgerlerge tıimdi bola ala ma» degen saýal tóńireginde pikirtalas berilgen. Pikirleri ekige jarylǵan mamandardyń biri árbir ata-ana balasyn oqytý úshin ózi qarjy jınaqtaý kerektigin alǵa tartsa, ekinshi jaq bul rette mindetti túrde memlekettiń qoldaýy qajet dep esepteıdi. Bilim alýdyń qazirgi qıyndyqtaryn sóz etken bul máselege bilim salasynyń bilgirleri óz pikirlerin qosqan.
Gazet kótergen taǵy bir másele «Tarıhı tulǵalarymyzdy jas urpaq jaqsy bile me?» degen taqyryp tóńireginde órbigen. Shyndyǵynda búgingi jas býyn ókilderi ulttyq tarıhymyzdy qanshalyqty tereń biledi, jalpy tarıhty oqytý júıesi bizde durys jolǵa qoıylǵan ba? Osy saýaldyń jaýabyn gazet tilshisi tıisti mamandardan surastyrady.
***
«Izvestııa-Kazahstan» gazeti «Est narodnye aktsıonery-mıllıonery» atty materıalynda Qaraǵandy oblysynyń bir turǵyny «Halyqtyq IPO» baǵdarlamasy aıasynda «QazTransOıl» AQ-nyń 2 mln. teńgeden astam qarjyǵa úsh myń aktsııasyn satyp alýǵa nıet bildirgenin jazady. Búginde bul óńirdegi rekordtyq tapsyrys bolyp tabylady. «Qazposhta» AQ-nyń oblystyq fılıalynyń málimetinshe, memlekettik baǵdarlama belsendi qarqyn alyp kele jatyr. Investıtsııalyq baǵdarlamanyń birinshi kúninen bastap halyqtyń belsendiligi baıqalýda. Atap aıtqanda kompanııanyń aktsıoneri bolýǵa bel býǵandardyń sany kún sanap artyp keledi.