FlyArystan-nyń 12 jasar qyzdy áýejaıda qaldyryp ketýi: kompanııa jaýapqa tartyldy
«Kóptegen shaǵymdar men jolaýshylardyń quqyqtaryna nuqsan keltirgen oqıǵalardy eskere otyryp, mınıstrlik jedel túrde tıisti sharalardy qabyldady. «Eır Astana» áýe kompanııasymen jáne «FlyArystan» AQ-men birlesip bolǵan oqıǵalardyń mán-jaılaryn zerdeleý, sondaı-aq bolashaqta mundaı jaǵdaılardy qaıtalamaý maqsatynda sharalar qabyldaý úshin kóshpeli jumys keńesin ótkizgen Azamattyq avıatsııa komıteti qyzmetkerlerinen turatyn jumys komıssııasy quryldy. FlyArystan áýe kompanııasy bıylǵy 21 shildedegi «Astana – Oral» baǵyty boıynsha reıske zańsyz jiberilmegen kámeletke tolmaǵan jolaýshy Z. Galıevaǵa qatysty reıs mártebesi ózgergen kezde, qyzmet kórsetpegeni úshin ákimshilik jaýapkershilikke tartyldy. Mundaı jaǵdaılardy boldyrmaý úshin FlyArystan áýe kompanııasy ishki protsesterdi ońtaılandyrdy jáne balalarǵa qyzmet kórsetý boıynsha algorıtmderdi qatańdatty. Tıisti talaptardy buzýǵa jol bergen avıakompanııa qyzmetkerleri tártiptik jaýapkershilikke tartyldy», - delingen QR Kólik mınıstrliginiń Kazinform agenttigine bergen jaýabynda.
Vedomstvo málimetinshe, «Qazaqstannyń avıatsııalyq ákimshiligi» AQ bıylǵy 5-11 tamyz aralyǵynda qoǵamdyq rezonans týdyrǵan reısterdiń keshigýi men bolǵan oqıǵalardyń sebepterin anyqtaý faktisi boıynsha jospardan tys tekserý uıymdastyrdy.
«Reısterdiń barlyq keshigýi oqıǵasy tehnıkalyq sebepterge baılanysty ekeni anyqtaldy. Daýyldyń saldarynan ushaqtardyń zaqymdanýyn, áýejaılardyń arnaıy kólikteriniń zaqymdanýyn, sondaı-aq Pratt & Whithney kompanııasy shyǵarǵan qozǵaltqyshtardyń tehnıkalyq aqaýlaryn rastaıtyn tehnıkalyq qujattama (borttyq jýrnaldar) tekserildi.
Eske salsaq, bıyl jazda Oral qalasynyń qos turǵyny, egizder – Záýre men Zere Amerıkadaǵy til mektebinen Astana arqyly keri ushyp shyqqany, elordaǵa aman jetken qos jasóspirimniń biri «Astana – Oral» baǵytynda ushqan FlyArystan áýekompanııasynyń ushaǵynan qalyp qoıǵany habarlanǵan edi.
Atap aıtqanda, 21 shildede «Astana-Oral» reısine 12 jasar qyz jiberilmegen. Bul oqıǵa qoǵamda biraz talqylandy. Osydan keıin FlyArystan basshysy Oralda egizderdiń anasy Jazıra Mýsınamen kezdesti.