FlyArystan kompanııasynyń ushaǵy Almaty áýejaıyna májbúrli qondy

ALMATY. QazAqparat – FlyArystan kompanııasynyń ushaǵy naızaǵaı men ekpindi jel saldarynan Shymkent qalasyna qona almaı, Almaty áýejaıyna qaıta oralýǵa májbúr boldy, dep habarlaıdy QazAqparat tilshisi.

«Ushý ýaqyty 16 mamyr, saǵat 13:10-ǵa belgilengen KS 7103 «Almaty – Shymkent» reısi Shymkent qalasyndaǵy qolaısyz kún raıyna, atap aıtqanda, naızaǵaı men qatty jelge baılanysty Almatyǵa májbúrli túrde qondy», - dep habarlady áýe kompanııasynyń baspasóz qyzmetinen.

Ushyp-qoný jolaǵynyń qarsy beti jasandy kedergilerdiń (qurylystardyń) bolýy saldarynan ýaqytsha jabyq turǵandyqtan, onda qoný múmkin bolmaǵan.

«Ushyp-qoný jolaǵynyń tolyqqandy jumys istemeýi osy reıstiń barlyq jolaýshylarynyń jaǵdaıyn qıyndatady, sondaı-aq avıkompanııanyń qyzmetine teris áser etedi. Atap aıtqanda, bul qaıta aınalyp kelý, qosalqy aerodromǵa ketý, ushý aerodromyna oralý jáne basqa da josparlanbaǵan sharalardy oryndaýǵa májbúrleıdi.

Ókinishke oraı, Shymkent qalasy áýejaıyndaǵy ushyp-qoný jolaǵynyń tolyqqandy iske qosylý merzimi týraly málimetke ıe emespiz. Jaqyn ýaqytta quzyrly organdar bul ótkir máseleniń sheshimin tabady dep senemiz», - dedi FlyArystan kompanııasynan.

Atalǵan reıstiń Almatydan ushý ýaqyty 16 mamyr, saǵat 15:40-qa josparlanǵan.

«Biz reısterdiń keshigý jáne múldem ushpaı qalý jaǵdaılarynyń aldyn alý boıynsha barlyq sharany qabyldaımyz. Biraq keıbir jaǵdaılar bizdiń baqylaýda emes. Búgingi jaǵdaıda reıstiń keshigý sebebi avıakompanııanyń kinásinen emes jáne onyń baqylaýynan tys boldy», - dep málimdedi vedomstvodan.