FlyArystan kompanııasynyń birneshe reısi keıinge qaldyryldy

ASTANA. QazAqparat – FlyArystan kompanııasynyń Aqtóbe-Aqtaý baǵytyndaǵy reısi tehnıkalyq sebeppen ushpaı qaldy, dep habarlaıdy QazAqparat tilshisi.

«FlyArystan 25 shilde kúni saǵat 10:05-te Aqtóbe-Aqtaý KS7777 reısi tehnıkalyq sebeppen perronǵa oralýǵa májbúr bolǵanyn habarlaıdy. Ushý aldyn ala Aqtóbe qalasynyń jergilikti ýaqyty boıynsha 26.07.2023 saǵat 01:30-ǵa aýystyryldy», - dep jazylǵan áýe kompanııasynyń habarlamasynda.

Atalǵan sebepterge baılanysty Aqtaý-Shymkent KS7576 reısi jergilikti ýaqytpen 25 shilde saǵat 16:15-ke aýystyryldy.

Shymkent-Aqtaý baǵytyndaǵy KS7575 reısi 25 shilde saǵat 20:00-ge aýystyryldy.

«Biz jolaýshylardan shyn júrekten keshirim suraımyz jáne ushý qaýipsizdigi bizdiń basty mindetimiz ekenin habarlaımyz. Biz osy reıs jolaýshylaryna mynadaı qoldaýdy usynamyz: eki saǵattan artyq keshiktirilgende jolaýshylar alkogolsiz sýsyndarmen qamtylady, uzaqtyǵy bes mınýttan aspaıtyn eki telefon qońyraýyn nemese elektrondy poshta arqyly eki habarlamany suratýǵa quqyly. Tórt saǵattan artyq keshiktirilgende ystyq tamaq beriledi. Sýsyndar men tamaqtaný máseleleri boıynsha áýejaıdaǵy FlyArystan ókilderine júginýdi suraımyz», - deıdi kompanııa.

Ushaq kúndizgi ýaqytta 8 saǵattan artyq jáne túnde 6 saǵattan astam ýaqyt keshiktirilse, jolaýshylar jatyn oryn, sondaı-aq turǵylyqty jerine deıin jáne keri qaraı transfer suraı alady.

Ushý bes saǵattan astam keshiktirilse, jolaýshylar jaqyn ýaqyttaǵy reıske oryn bolǵan jaǵdaıda bir tegin qaıta brondaýdy tańdaı alady nemese bıletin tolyq qaıtara alady.