FlyArystan-ǵa jolaýshylardy tasymaldaýdan bas tartý faktisi boıynsha tekserý júrgizildi

NUR-SULTAN. QazAqparat - Qazaqstannyń avıatsııa ákimshiligi FlyArystan áýe kompanııasyna jospardan tys ınspektsııalyq tekserý júrgizdi, dep habarlaıdy QazAqparat.

QR IIDM Azamattyq avıatsııa komıtetiniń málimeti boıynsha, tekserý júrgizýge 2022 jylǵy 19 naýryzdaǵy Nur-Sultan - Qostanaı baǵyty boıynsha KS 7341 reısimen jolaýshylardy tasymaldaýdan bas tartý faktisine qatysty jolaýshylardyń ótinishi negiz bolǵan.

Tekserý nátıjeleri boıynsha jolaýshylardy tasymaldaýdan bas tartýdyń sebebi evakýatsııalyq traptan aqaý tabylyp, áýe kemesiniń bortyndaǵy jolaýshylarǵa arnalǵan oryndar sany júzge deıin qysqartylǵan.

Oryndar sanyn qysqartý ushý qaýipsizdigi talaptary negizinde júzege asyrylǵan. Avarııalyq trap durys jumys istemese, jolaýshylardy apatty jaǵdaıda túsirý múmkin emes. Osy sebepti áýe kompanııa 180 orynnyń 70-in jabýǵa májbúr bolǵan.

Qazaqstan Respýblıkasy Investıtsııalar jáne damý mınıstriniń 2015 jylǵy 30 sáýirdegi №540 buıryǵymen bekitilgen Jolaýshylardy, bagajdy jáne júkterdi áýe kóligimen tasymaldaý qaǵıdalaryna sáıkes, jolaýshylardy áýe kemesiniń ushý qaýipsizdigine qater tóndiretin sebepter boıynsha tasymaldaýdan bas tartylsa, paıdalanylmaǵan bılet quny nemese onyń bir bóligi qaıtarylady.