«FlyArystan» elordadan 3 qalaǵa áýe reısterin ashty

NUR-SULTAN. QazAqparat – «Samuryq-Qazyna» AQ-tyń Logıstıka jáne halyqaralyq yntymaqtastyq jónindegi basqarýshy dırektory Qanat Alpysbaev «FlyArystan» áýe kompanııasynyń aldaǵy josparymen bólisti, dep habarlaıdy QazAqparat tilshisi.

«Loýkoster týraly baıandap óteıin: osy jyly bastalǵan áýe tasymaldary aıtarlyqtaı joǵary nátıje kórsetti. Júkteme 90 paıyzdan asyp, 450 myńnan astam bılet satyldy. Olardyń 60 paıyzy eń tómengi tarıfter boıynsha 6 aı ishinde 10 myń teńgege deıingi baǵamen usynyldy. Loýkosterdiń nátıjesinde áýejaılardyń qyzmeti jaqsarǵanyn atap ótý qajet. Osy jyldyń mamyrynan bastap Qazaqstannyń 7 áýejaıyndaǵy ishki reıster boıynsha jolaýshylar aǵyny orta eseppen 20 paıyzǵa ósti», - dedi ol.

Sonymen birge, Qanat Alpysbaev ulttyq loýkosterdiń aldaǵy josparymen bólisti.

«Jýyq arada Nur-Sultannan Pavlodar, Semeı, Shymkent qalalaryna baǵyttalǵan áýe reısteri ashylady. 2020 jyldyń sońyna deıin loýkoster aımaqtyq ortalyqtardyń kóbine ushaq ushyrady. Sonymen birge, Nursultan Nazarbaev áýejaıynan Máskeý qalasy baǵyty boıynsha halyqaralyq baǵdardy ashý josparda bar. Qaraǵandy, Aqtóbe qalalaryna da ushaq ushyrý kózdelgen», - dedi ulttyq kompanııa ókili.