FlyArystan: bortserikke qol jumsap, ushaqta bomba bar degen jolaýshy qamaýǵa alyndy
FlyArystan áýekompanııasynyń Astana — Óskemen baǵytynda ushatyn reısi ushýǵa daıyndyq júrgizip, bortserik jolaýshylardy sanap jatqanda ótip bara jatqan jolaýshy kenet ishinen uryp jibergen. Áýe kompanııanyń habarlaýynsha, buǵan deıin otyrǵyzý kezinde jolaýshy tarapynan qandaı da bir destrýktıvti minez-qulqy baıqalmaǵan.
— Oqıǵa ornyna polıtsııa qyzmetkerleri men kompanııanyń avıatsııalyq qaýipsizdik qyzmetiniń mamandary shaqyryldy. Qujattardy tekserý barysynda destrýktıvti jolaýshy bomba bar ekenin de málimdedi. Osydan keıin áýejaıdyń kınologııalyq qyzmeti shaqyrylyp, barlyq jolaýshylar ushaqtan shyǵaryldy. Sondaı-aq, bortseriktiń jaǵdaıyn tekserýden ótkizý úshin áýejaıdyń medıtsınalyq qyzmeti shaqyryldy, —delingen habarlamada.
Áýe kemesine jedel túrde muqııat tekseris júrgizildi, nátıjesinde jarylǵysh nemese basqa da tyıym salynǵan zattar tabylǵan joq.
— Áýekompanııa borttaǵy quqyq buzýshylarǵa qatysty tózimdilik tanytpaý saıasatyn ustana otyryp, destrýktıvti jolaýshyǵa qatysty qatań sharalar qabyldaıdy. Bortta destrýktıvti minez-qulyq kórsetýge jáne erejelerdi buzýǵa múldem jol berilmeıtinin jáne bul zańnamada belgilengen jaýapkershilikke ákeletinin eske salamyz, — dep habarlady FlyArystan áýe kompanııasynan.
Kólik polıtsııasy departamentiniń málimetinshe, buzaqylyq jáne terrorızm aktisi týraly jalǵan habarlaý faktileri boıynsha qylmystyq ister qozǵaldy. Kúdikti ýaqytsha ustaý ızolıatoryna qamalǵan.
Eske sala keteıik, buǵan deıin terrorızmdi nasıhattaǵany úshin eki azamat 7 jylǵa sottalǵanyn jazǵan bolatynbyz.