Fınlıandııadan shyqqan alǵashqy konteınerlik poıyz Qazaqstan arqyly Qytaıǵa bet aldy

ASTANA. QazAqparat - 10 qarashada «QTJ» UK» AQ enshiles kásiporny - «KTZ Express» AQ temirjol quramy Fınlıandııanyń Koývola stansasynan Reseı, Qazaqstan aýmaǵymen Qytaıdyń Sıan qalasyna bet aldy, dep habarlaıdy QazAqparat «Qazaqstan temir jolynyń» baspasóz qyzmetine silteme jasap.

Koývola stansasyndaǵy tuńǵysh poıyzdy shyǵaryp salý saltanatyna Qazaqstan elshiliginiń ókilderi, Fınlıandııa ádilet mınıstri, Koývola qalasynyń meri, QR, QHR, Reseı saýda ókildiginiń, Sıan qalasynyń, basqa da kólik-logıstıkalyq kompanııalardyń jetekshileri qatysty. 

Orman aǵashtaryn tıegen poıyz 8,5 myń shaqyrymdy 10 kúnde júrip ótedi. Onyń úsh myń shaqyrymy Qazaqstan aýmaǵyna kiredi. «Qorǵas-Shyǵys qaqpasy» AEA Qurǵaq portynda basqa vagonǵa aýystyrylyp, Altynkól shekaralyq stansasynan ótedi.

«Fınlıandııamen temirjol salasyndaǵy seriktestikti tabysty dep ataýǵa bolady. Jaqsy is jalǵasyn tabatyny sózsiz. Qazaqstan aýmaǵy arqyly konteınerlik poıyzdyń Fınlıandııadan -Qytaıǵa, odan keri qaraıǵy baǵdarda tranzıttik júkterdi tasymaldaýy jobaǵa qatysýshy elder úshin mańyzdy oqıǵa», - deıdi  «KTZ Express» AQ Konteınerlik tasymaldaý departamentiniń dırektory Almat Kárimov.

Soltústik Eýropadan Qytaıǵa konteınerlik poıyzdy jasaqtaýdy «KTZ Express» AQ mýltımodaldyq logıstıkalyq kompanııasy men fındik «Couvola innovation Oy» kompanııasy júzege asyrdy. Koývola - Býslovskaıa - Altynkól - Sıan baǵdarymen tasymaldanatyn júkterdiń jyldyq boljamdy shamasy 1 mıllıon tonnaǵa jetedi.

Atap óterligi, 2016 jyly jeltoqsanda Qazaqstan, Fınlıandııa, Reseı, Qytaı arasyndaǵy «Shyǵys kólik dálizi» kelisimine qol qoıyldy.