Fınlıandııa Qazaqstan ekonomıkasyna 366 mln dollar ınvestıtsııa saldy

NUR-SULTAN. QazAqparat - QR Premer-Mınıstri Asqar Mamın Fınlıandııa Respýblıkasynyń syrtqy saýda jáne halyqaralyq damýǵa járdemdesý mınıstri, Parlamentiniń depýtaty Vılle Skınnarımen kezdesý ótkizdi, dep habarlaıdy QazAqparat.

Taraptar saýda-ekonomıkalyq, ınvestıtsııalyq, energetıkalyq, kólik-logıstıkalyq, bilim berý, densaýlyq saqtaý, tsıfrlandyrý, jasyl ekonomıkany damytý jáne qorshaǵan ortany qorǵaý salalaryndaǵy ekijaqty yntymaqtastyqty damytý perspektıvalaryn talqylady. Sońǵy 15 jyl ishinde Fınlıandııa Qazaqstan ekonomıkasyna $366 mln ınvestıtsııa saldy. Osy jyldyń I toqsanynyń qorytyndysy boıynsha elder arasyndaǵy taýar aınalymy 2020 jyldyń sáıkes kezeńimen salystyrǵanda $111,2 mln qurap, 3,4 ese ósti.

Úkimet basshysy ekijaqty saýda kólemin odan ári arttyrý jáne tsıfrlyq tehnologııalar, AÓK, qaldyqtardy qaıta óńdeý jáne jasyl ekonomıkany damytý salalarynda birlesken ınvestıtsııalyq jobalardy iske asyrýǵa úlken áleýettiń bar ekenin atap ótti.

2020 jyly pandemııaǵa qaramastan, «Fınlıandııa – Qytaı» qatynasy boıynsha Qazaqstan aýmaǵy arqyly tranzıtpen konteınerlerdegi júkterdi temirjolmen tasymaldaý kólemi 5,2 myń JFE jetti, bul 2019 jylǵy kórsetkishke qaraǵanda 11%-ǵa artyq.

Osy jyldyń I toqsanynda bul kórsetkish 2020 jyldyń sáıkes kezeńimen salystyrǵanda 10%-ǵa ósip, 738 JFE qurady.

Kezdesýge QR ekologııa, geologııa jáne tabıǵı resýrstar mınıstri Maǵzum Myrzaǵalıev, tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın, ındýstrııa jáne ınfraqurylymdyq damý mınıstri Beıbit Atamqulov, sondaı-aq QR-nyń Fınlıandııadaǵy elshisi Janna Sartbaeva qatysty. V. Skınnarıdiń Qazaqstanǵa sapary aıasynda saýda, qarjy, energetıka, kólik, AÓK, bilim berý, densaýlyq saqtaý, orman jáne sý resýrstaryn utymdy paıdalaný sekildi salalardaǵy yntymaqtastyqty tereńdetýdi kózdeıtin Qazaqstan-Fınlıandııa Úkimetaralyq komıssııasynyń 11-otyrysynyń hattamasyna qol qoıyldy.

Buǵan qosa QR Ekologııa, geologııa jáne tabıǵı resýrstar mınıstrligi, «KaukoInternational Oy Ltd» kompanııasy jáne Qazaq-fın tehnologııalyq ortalyǵy arasynda ekologııa, orman jáne balyq sharýashylyǵy, qaldyqtardy qaıta óńdeý jáne sý resýrstaryn basqarý salalaryndaǵy ózara is-qımyldy nyǵaıtý jáne damytýdy kózdeıtin Yntymaqtastyq týraly memorandýmǵa qol qoıyldy.