Fınalǵa tas-túıin daıynbyz – QR kókpar qurama komandasynyń aǵa jattyqtyrýshysy

<p>ASTANA. KAZINFORM &ndash; Erteń, &laquo;Qazanat&raquo; ıppodromynda qazaqstandyq kókparshylar Qyrǵyzstan kókpar komandasymen altyn júlde úshin talasady. QazAqparat tilshisine QR kókpar qurama komandasynyń aǵa jattyqtyrýshysy Omarbek Erkebaı shabandozdardyń daıyndyǵy týraly aıtyp berdi.</p>

«Reseı komandasymen kezdesip, aqtyq synǵa joldama aldyq. Toptyq kezdesýlerde úlken qarsylas bolmady. Búgingi oıynǵa asa daıyndyqpen shyqqanbyz. Óıtkeni Reseı komandasynda óner kórsetip júrgenderdiń kóbi qyrǵyz baýyrlarymyz. Attary da qyrǵyz eliniń attary. Oıyn teń dárejede ótedi dep oılaǵanbyz. Jalpy osy kóshpendiler oıyndaryna tyńǵylyqty daıyndaldyq. 5 ret oqý-jattyǵý jıynyn ótkizdik. Jigitterimiz de, attarymyz da saqadaı saı, tas-túıin daıynbyz. Erteń osy qurammen qyrǵyzstandyq kókparshylaǵa qarsy turyp, birinshi oryn alý úshin dodaǵa túsemiz», - deıdi ol. 

Omarbek Erkebaı sonymen birge AQSh tan kelgen kókparshylardyń oıyny týraly pikir bildirdi.

«Amerıkalyq kókparshylar osymen úshinshi ret kóshpendiler oıyndarynda óner kórsetip jatyr. Ulttyq sportymyzǵa qyzyǵýshylyq tanytyp, úırenip jatqany úshin alǵys aıtamyz. Nátıjesin ózderińiz kórdińizder. Qansha degenmen ata-babalarynan kele jatqan qanynda bar sport túri bolmaǵandyqtan qazaq pen qyrǵyzǵa qarsylas bola alady dep aıta almaımyn», - deıdi QR kókpar qurama komandasynyń aǵa jattyqtyrýshysy.

Aıta keteıik, búgin qazaqstandyq kókparshylar Reseıdi 18:2 esebimen jeńip, fınalǵa ótken bolatyn.