Fılosofııa ál-Farabıdi aınalyp óte almaıtyn ǵylym – elordadaǵy forým

NUR-SULTAN. Qaz-Aqparat - Ál-Farabı «Qaıyrymdy qala turǵyndary» atty eńbeginde qazirgi kúnde de ózektiligin joımaǵan máselelerdi kótergen. Bul týraly elordada ótken «Ál-Farabı jáne qazaqstandyq fılosofııa» atty respýblıkalyq forýmda aıtyldy, dep habarlaıdy QazAqparat tilshisi.

«Ǵylym men tehnıka damyǵanyna qaramastan adamzat úshin qundylyǵy ózgermeıtin uǵymdar bar. Sol qundylyqtardyń biri - bilim jáne tárbıe máselesi. Ál-Farabı «Qaıyrymdy qala turǵyndary» eńbeginde qazirgi kúnde de ózektiligin joımaǵan máselelerdi aıtqan. Bilim men tárbıeni bóle-jara qaraýǵa bolmaıdy. Osyndaı sharalar dıskýssııa alańy retinde ótkeni jaqsy, sebebi jas býyn men aǵa býyn arasynda qundylyqtar ártúrli bolýy múmkin», - deıdi Bilim jáne ǵylym mınıstrligi «Orta bilimdi jańǵyrtý ortalyǵynyń» jetekshisi Sultan Jaıyq.

Forýmǵa elimizdiń túkpir-túkpirinen oqytýshylar kelgen.

«Bul - respýblıkalyq deńgeıde ótip jatqan ǵylymı forým. Sharada Pavlodar, Aqtóbe, Aqtaýdaǵy memlekettik ýnıversıtet mamandary men stýdentteriniń baıandamalary oqylýda. Bul agrarlyq baǵyttaǵy ýnıversıtet, biraq barlyq joǵary oqý oryndarynda jalpy bilim berý júıesi boıynsha 1-kýrs stýdentteri «Fılosofııa» pánin oqıdy. Fılosofııa ál-Farabıdi aınalyp óte almaıtyn ǵylym», - deıdi S.Seıfýllın atyndaǵy qazaq agrotehnıkalyq ýnıversıtetiniń gýmanıtarlyq fakýltetiniń dekany Bolat Aıapbergenov.