FIFA prezıdenti Qazaqstan fýtboly týraly: Durys jolǵa túskenderińizge senimdimin

ASTANA. QazAqparat – Halyqaralyq fýtbol federatsııasynyń (FIFA) prezıdenti Djannı Infantıno BAQ ókilderimen baspasóz konferentsııasyn ótkizdi, dep habarlaıdy QazAqparat tilshisi.

Baspasóz konferentsııasy barysynda jýrnalıster FIFA prezıdenti Qazaqstan fýtbolynyń qazirgi deńgeıi týraly pikiri qandaı ekenin surady.

«Qazaqstan quramasy týraly aıtqanda áýeli Danııa quramasyn jeńgenimen quttyqtaǵym keledi. Bul óte kúrdeli oıyn boldy. Qazaqstan Eýropadaǵy eń úzdik quramalardyń birin jeńdi. Onyń ústine bul óte mańyzdy match bolatyn. Bul joldastyq kezdesý nemese qalypty oıyn emes edi. Árıne, Danııa quramasy bul jerge tek jeńsek dep kelgen bolatyn. Bul bir match qana degenimizben, ondaǵy jeńis mádenıeti baı jas memleketterińiz úshin sımvolǵa toly boldy. Elderińizdiń óz deńgeıin maqtan tutatyny qurama komandalaryńyzdyń oıynynan da kórinis taýyp keledi», - dedi Djannı Infantıno.

Onyń paıymynsha, Qazaqstan quramasy Ulttar lıgasynyń irikteý oıyndaryn óte tabysty ótkizgen.

«Eldegi buqaralyq fýtbolǵa salynyp jatqan ınvestıtsııa, Qazaqstan fýtbol federatsııasy men Úkimetiniń arasyndaǵy tyǵyz baılanys salany jemisti ete túsedi. Bizde birge qalaı jumys isteı alatynymyz týraly belgili bir ıdeıalar men josparlar bar. Osynyń bári Qazaqstan ulttyq quramasynyń oıyndarynda kórinis tabady. Qazaqstan durys jolda kele jatqanyna senimdimin. Sońǵy jetistikter – sonyń dáleli», - dedi FIFA prezıdenti.