Feık: COVID-19 qarsy vaktsınatsııa bastalǵannan beri ólim-jitim kóbeıdi

NUR-SULTAN. QazAqparat - Áleýmettik jelilerde qazaqstandyqtar COVID-19-ǵa qarsy egý naýqany bastalǵannan keıin álemde ólim-jitimniń kúrt óskeni týraly jalǵan aqparat tarady, dep habarlaıdy QazAqparat stop.kz saıtyna silteme jasap.

Dáriger Nıkolaı Bocharov «Reseıde COVID-19 qarsy vaktsınoprofılaktıkanyń medıtsınalyq, uıymdastyrýshylyq jáne saıası erekshelikteri» konferentsııasynda ólim-jitimniń artqany týraly málimdeme jasady. Bul is-sharaǵa negizinen vaktsınatsııaǵa qarsy adamdar qatysqan. Buǵan deıin biz osy konferentsııada aıtylǵan feıkti joqqa shyǵardyq.

Shyn máninde, álemniń ártúrli elderinde jınalǵan statıstıkalyq jáne ǵylymı málimetter vaktsınatsııa naýqany ólimniń ósýine sebep boldy degen teorııaǵa qaıshy keledi.

Jappaı vaktsınatsııanyń basynda brıtandyq ǵalymdar COVID-19 juqtyrý jaǵdaılarynyń kóbeıýine qaramastan, elde ólim-jitim tómendegenin anyqtady. Bul vaktsınalardyń aýrýdyń aýyr saldary men ólimniń aldyn alýda tıimdiligin kórsetti.

Aǵymdaǵy jyldyń 24 tamyzynda AQSh Densaýlyq saqtaý mınıstrligi, mamandardyń esepteýinshe, vaktsınalar elde COVID-19-dan 140 000 jýyq ólimniń aldyn aldy, jarııalaǵan maqalada, dep málimdedi.

Aǵymdaǵy jyldyń qyrkúıeginde AQSh-tyń Aýrýlardy baqylaý jáne aldyn alý ortalyǵynyń zertteýi vaktsınatsııalanbaǵan adamdar úshin COVID-19-dan qaıtys bolý qaýpi vaktsına alǵandarǵa qaraǵanda 11 ese joǵary ekenin kórsetti.

Ulybrıtanııada júrgizilgen taǵy bir zertteý vaktsına halyqqa qoljetimdi bolǵannan keıin birden birneshe jas tobynda ólim-jitim tómendegenin kórsetti.

Soǵan qaramastan, birqatar elderde KVI-ge qarsy vaktsınalar bolsa da, aýrý men ólimniń órshýi jalǵasýda. Bloomberg basylymy muny birneshe faktormen túsindiredi, onyń ishinde densaýlyq saqtaý júıesiniń damýy, eldegi vaktsınatsııanyń jalpy deńgeıi jáne vırýstyń jańa nusqalarynyń taralýy bar.

Aıta keteıik, Reseıde vaktsınalardyń bolýyna qaramastan, búginde halyqtyń tek 33%-y tolyǵymen vaktsınatsııalandy. Sondaı-aq 3.4% birinshi doza aldy.

Bul rette ujymdyq ımmýnıtetke eldegi jalpy halyq sanynyń 70-90% vaktsınatsııa deńgeıinde ǵana qol jetkizýge bolady.

Vaktsınatsııa naýqanynyń bastalýyna baılanysty ólim-jitimniń ósýi týraly málimdemeler vaktsınatsııaǵa qarsy adamdar arasynda keńinen tanymal. Buǵan deıin mundaı qaýesetter Ulybrıtanııada taralǵan, biraq olar birden teriske shyǵaryldy.

Jalpy, egý naýqany ólim statıstıkasyna teris áser etpeıdi. COVID-19 qarsy vaktsına qaýipsiz jáne tıimdi.

Vaktsınatsııa naýqany ólim-jitimdi arttyrdy degen pikirler negizsiz jáne faktilerge qaıshy keledi.