Feık: «Balany mektepke jibere otyryp, ata-analar ony COVID-19-ǵa qarsy vaktsınatsııalaýǵa ruqsat beredi»

NUR-SULTAN. QazAqparat – Qaznet paıdalanýshylary ártúrli elderde qoldanylatyn medıtsınalyq protsedýralardy júrgizýge kelisim berý tetikteri sıpattalǵan DDSU-nyń eski qujatyn taǵy da taratýda. Onda vaktsınatsııaǵa qarsy adamdardyń aıtýynsha, vaktsınatsııa kúni balanyń mektepte bolýy protsedýrany ótkizýge kelisim retinde qarastyrylady, dep habarlaıdy stopfake.kz.

Qujat 2014 jyly shyqqan jáne COVID-19 qarsy vaktsınatsııalaýǵa eshqandaı qatysy joq. Onda medıtsınalyq protsedýralardy júrgizýge beriletin kelisimniń túrleri kórsetilgen, mysaly, jazbasha, aýyzsha jáne uıǵaryndy.

Jeli qoldanýshylaryn kóbine qujattyń uıǵaryndy kelisim tarmaǵy alańdatyp otyr. Qazaqstandyqtardyń pikirinshe, balanyń mektepte bolýynyń ózi osyndaı kelisim retinde sanalýy yqtımal. Bul olaı emes. Birinshiden, kóptegen elderde, onyń ishinde Qazaqstanda balalardy vaktsınatsııalaý onyń ata-anasynyń jazbasha kelisimimen ǵana júrgiziledi. Ekinshiden, keıbir memleketterde uıǵaryndy kelisim ata-analar mektepte vaktsınatsııalaý júrgiziletini týraly, ony ótkizý kúnderi, saldary men basqa da nıýanstary týraly tolyq habardar bolǵan jaǵdaıda ǵana qoldanylýy múmkin.

Demek, Qazaqstanda vaktsınatsııa kúni balalardyń mektepterde bolýy olardyń ata-analarynyń protsedýrany ótkizýge bergen kelisimi retinde qarastyrylmaıdy. Elimizde ata-analardyń jazbasha kelisiminsiz balalardy vaktsınatsııalaý zańsyz bolyp tabylady.