Feık aqparat koronavırýstan da zııan bolýy múmkin – Shyńǵys Muqan
Onlaın jıynǵa Qazaqstan Jýrnalıster odaǵynyń tóraǵasy Seıitqazy Mataev pen Shymkent qalasy ákiminiń birinshi orynbasary Shyńǵys Muqan, QR Parlamenti Senatynyń depýtaty Aıgúl Qapbarova men basqa da elge tanymal jýrnalıster, blogerler men dárigerler qatysty. Jıynnyń ereksheligi – bir platformada elimizdegi úsh kásibı jýrnalıster uıymynyń ókilderi bas qosty. Qazaqstan Jýrnalıster odaǵy Seıitqazy Mataev, «Qazaqstan Medıa alıansynyń» basqarma tóraǵasy, senator Nurtóre Júsip jáne «BAQ KASIPODAQ» salalyq kásipodaǵynyń tóraǵasy Zeıin Álipbek qatysqan jıynda otandyq jýrnalıstıkaǵa ortaq máseleler qarastyryldy.
«Koronavırýstyń ekinshi tolqynynyń bastalýy ınfodemııanyń, ıaǵnı jalǵan, el arasynda úreı týdyratyn aqparattar epıdemııasynyń bastalatynyn bildiredi. Infodemııanyń basty qaýpi jurtshylyq jalǵan men shynaıy aqparattardy ajyrata almaı qalady. Mundaı jaǵdaıǵa túsken adam dárigerlerdiń keńesterine qulaq asýdy qoıady. Al bul bárinen de qaýipti», – dedi onlaın konferentsııanyń moderatory, Qazaqstan Jýrnalıster odaǵy Túrkistan oblystyq fılıalynyń tóraǵasy Ǵalymjan Elshibaı.
Jıynda sondaı-aq, ınfodemııanyń kesirinen búkil álemde kóptegen adam kóz jumǵany sóz boldy. Óıtkeni, túrli aqparat quraldary arqyly koronavırýsty emdeýdiń tekserilmegen ádis-tásilderi taralyp, sonyń saldarynan naýqastar dárigerlerge tym kesh júgingen.
Bul rette Shymkent qalasy ákiminiń birinshi orynbasary Shyńǵys Muqan vırýsqa qaraǵanda, jalǵan aqparattyń qateri kóbirek ekenine toqtalyp ótti. Ol feık jańalyqtarǵa qarsy ımmýnıtet qalyptastyrý qajettigine toqtaldy.
«Tanymal adamdar estigenin aıtady. Olardyń tanymaldylyǵy kópshiliktiń kókeıine senim uıalatady da, solardyń aıtýymen áldebir nárseniń shıpasyna senip, densaýlyǵyna zııan keltirip jatqan jaǵdaılar bar. Sondyqtan aqparatty tekserýdiń birinshi erejesi aqparat berýshiniń kompetentsııasyna mán berý qajet. Emdelýdiń jolyn medıtsınadan habary joq nemese áldebir adamnyń aıtqany durys pa, dárigerdiń aıtqany durys pa? Osylarda aıyrmashylyq úlken. Feık aqparat koronavırýstan da zııan bolýy múmkin. Aqparatqa ımmýnıteti joq adam densaýlyǵyna odan beter zııan keltiredi»,- dep atap ótti Sh.Muqan.
Konferentsııa barysynda árbir kásibı jýrnalıstiń óz isine jaýapkershilikpen qarap, aqparattyq gıgıenany saqtaý qajettiligi aıtyldy. Jıynda pandemııa kezinde jýrnalıster dárigerlerden kem jumys istemese de, aqparat salasy qyzmetkerlerine jaǵdaıdyń jasalmaǵanyna nazar aýdaryldy.
Belgili jýrnalıst, Senat depýtaty Aıgúl Qapbarova keıbir memlekettik organ basshylarynyń pandemııany syltaýratyp tilshilerge aqparat berýden bas tartý faktileriniń kezdeskenine, mundaı qıyn-qystaý kezde BAQ ókilderiniń quqyqtaryn bulaı shekteýge bolmaıtyna toqtalyp ótti.
Sondaı-aq, senator otandyq BAQ-ty damytýdyń 2021-2023 jylǵa arnalǵan ulttyq jospary jasalyp, Úkimet qaýlysymen bekitilgenin aıtyp, atalǵan jospardyń baǵyt-baǵdaryn tanystyryp ótti.
Jıyndy qorytyndylaǵan Qazaqstan Jýrnalıster odaǵynyń tóraǵasy Seıitqazy Mataev onlaın konferentsııada qozǵalǵan máseleniń ózektiligin atap ótip, paıdaly jıyndardy aldaǵy ýaqytta da uıymdastyryp otyrýdyń mańyzdylyǵyna toqtaldy.