Feıerverkti jón-josyqsyz qoldanǵan 70 adamǵa aıyppul salyndy

ASTANA. QazAqparat – 2022 jyldyń qańtar-jeltoqsanynda eldi mekenderde pırotehnıkalyq buıymdardy qoldaný boıynsha 92 ákimshilik is qaraldy. Bul bir jyl burynǵy kórsetkishten 28,1 paıyzǵa az, dep habarlaıdy QazAqparat tilshisi.

Energyprom.kz portalynyń málimetinshe, atalǵan isterdiń 76-syna ákimshilik jaza qoldanylsa, qalǵan 16 is qysqardy.

Al 76 istiń 70-inde aıyppul salynyp, 6 is boıynsha eskertý berildi. Salynǵan aıyppul somasy - 3,4 mln teńge. Onyń 3,1 mln teńgesi óndirildi.

Óńirler arasynda quqyq buzýshylyqtyń basym bóligi Almaty men Pavlodar oblystarynda tirkelgen: ár óńirde 11 jaǵdaıdan.

Odan keıingi orynda Shyǵys Qazaqstan (10 jaǵdaı) men Qostanaı oblystary (8 jaǵdaı) tur.

Al jańadan qurylǵan Ultyaý, Abaı, Jetisý oblystarynda, sonymen qatar Batys Qazaqstan oblysynda birde-bir quqyq buzýshylyq tirkelgen joq.

Pırotehnıkalyq buıymdardy jónsiz paıdalaný búkil álemde ózekti bolyp otyr.

Máselen, AQSh-tyń tutynýshylyq taýarlar qaýipsizdigi jónindegi komıssııasy (CPSC) feıerverkke qatysty jaraqattar sany aıtarlyqtaı óskenin anyqtady.

CPSC málimetinshe, 2006-2021 jyldary aralyǵynda AQSh-ta feıerverkten bolatyn jaraqat sany 25 paıyzǵa artqan.

2021 jyly feıerverkpen baılanysty oqıǵalar kezinde keminde 10 adam qaza taýyp, shamamen 11,5 myń adam jaraqattanǵan.

Negizinen adamnyń qoly, saýsaqtary, beti, qulaǵy jáne aıaǵy jıi jaraqat alady.