Festıval qonaqtary on úzdik qoıylymdy tegin tamashalaıdy

ASTANA. QazAqparat - Astanada TEATRALL halyqaralyq teatr festıvali ónersúıer qaýymǵa esigin aıqara ashty. Bul shara kórnekti teatr jáne kıno rejısseri Ázirbaıjan Mámbetovtiń 90 jyldyǵyna arnalǵan, dep habarlaıdy QazAqparat.

Festıvaldiń saltanatty ashylý rásimi Á.Mámbetov atyndaǵy memlekettik drama jáne komedııa teatrynyń qabyrǵasynda ótti. Oǵan Astana qalasynyń ákimi Altaı Kólginov, Qazaqstannyń Eńbek eri, Qazaqstannyń Halyq ártisi, Qazaqstan Memlekettik syılyǵynyń laýreaty, Qazaqstan Teatrlary qaýymdastyǵynyń prezıdenti Asanáli Áshimov, Qazaqstannyń Halyq ártisi, opera ánshisi, professor, Halyq qaharmany, teatr jáne kıno rejısseri Ázirbaıjan Mámbetovtiń jary Qorlan Qalılambekova, sol sııaqty akterler Ádil Ahmetov pen Tursynbek Qabatov, ózge de elordalyq teatrlardyń ujymdary qatysty.

Dástúrge sáıkes spektakl bastalar aldynda festıvalge qatysýshylar qyzyl kilemniń ústinen júrip ótti. Sol sııaqty merekelik kesh barysynda qazaqstandyq teatr óneriniń sheberi Ázirbaıjan Mambetovtiń shyǵarmashylyq murasyna arnalǵan biregeı gologramma-tsıfrlyq kórmesi ótti. Joba avtory Baýyrjan Baqtygereev arraıy tájirıbelerdiń kómegimen osyndaı nátıjege qol jetkizdi.

Kórmege 30-ǵa jýyq eksponat qoıyldy. Kompozıtsııa zattar ornalasqan kóptegen bólimderden turady. Munyń bári arnaıy bólimderge ornatylǵan ekrandardyń astynda ornalasqan.

Teatr aptalyǵynyń saltanatty ashylýynda kórermen qaýymǵa Q.Qýanyshbaev atyndaǵy Memlekettik akademııalyq qazaq mýzykalyq-drama teatrynyń «Ǵasyrdan da uzaq kún» spektakli qoıyldy.

Bir apta ishinde festıval birneshe teatrdyń sahnasynda ótedi. Jalpy, festıval aıasynda nıet bildirýshiler 10 úzdik otandyq jáne sheteldik spektaklderge tegin qatysa alady.

Festıvaldiń jabylý saltanaty 30 qazanda ótedi. Saltanatty rásim kezinde «Úzdik qoıylym», «Úzdik er adam róli», «Úzdik áıel róli», «Ekinshi plandaǵy úzdik áıel róli», «Ekinshi plandaǵy úzdik er adam róli», «Úzdik stsenografııa», «Úzdik epızodtyq ról» nomınatsııalary boıynsha jeńimpazdarǵa syılyqtar tabystalady. Sondaı-aq, teatr ónerin damytýǵa qosqan úlesi úshin Ázirbaıjan Mámbetov atyndaǵy arnaıy syılyq taǵaıyndaldy.

Esterińizge sala keteıik, Astanadaǵy teatr festıvali 30 qazanǵa deıin jalǵasady. Oǵan elimizdiń 8 teatr ujymy jáne Reseı, Ázerbaıjan, Ózbekstan, Qyrǵyzstan jáne Túrikmenstan elderinen kelgen qurmetti qonaqtar – Sankt-Peterbýrg kameralyq teatry, Geıdar Álıev atyndaǵy Tbılısı memlekettik Ázerbaıjan teatry, Ózbek memlekettik Djızak mýzykalyq drama teatry, T. Abdýmomýnov atyndaǵy Qyrǵyz memlekettik akademııalyq drama teatry, Túrikmen Mahtýmkýlı atyndaǵy ulttyq mýzykalyq drama teatry qatysady.

Festıvaldiń arnaıy qonaǵy — GÝLAG tarıhynyń memlekettik murajaıy (Máskeý qalasy).