Ferroqorytpa zaýytyndaǵy oqıǵa: Qaraǵandy dárigerlerine elordadan áriptesteri kómekke keldi

<p>QARAǴANDY. KAZINFORM &ndash; Qaraǵandyda ferroqorytpa zaýytynyń zardap shekken segiz qyzmetkerine medıtsınalyq kómek kórsetý jalǵasyp jatyr. Barlyq patsıent Professor H.Maqajanov atyndaǵy kópsalaly aýrýhanada jatyr, dep habarlaıdy Kazinform agenttiginiń tilshisi.</p>

QR Densaýlyq saqtaý mınıstrliginiń tapsyrmasy boıynsha qosymsha medıtsınalyq kómekti kórsetý úshin Qaraǵandyǵa Akademık N.D.Bátpenov atyndaǵy Ulttyq travmatologııa jáne ortopedııa ǵylymı ortalyǵynyń dırektory Oljas Bekarysov bastaǵan qyzmetkerler arnaıy keldi.

«Medıtsınalyq toptyń quramyna tájirıbeli kombýstıolog-reanımatologtar kirdi. Elordalyq mamandar jergilikti dárigerlermen alǵashqy kezde barlyq qajetti medıtsınalyq kómektiń kórsetilgenin atap ótti», - dep málimdedi Qaraǵandy oblystyq Densaýlyq saqtaý basqarmasynyń baspasóz qyzmeti.

Vedomstvo habarlaǵandaı, zardap shekken alty adamnyń jaǵdaıy áli de óte aýyr. Taǵy eki naýqas ıntensıvti terapııa bóliminde. Naýqastardyń densaýlyǵy men ómiri úshin kúres jalǵasyp jatyr. Em alýshylarǵa barlyq qajetti medıtsınalyq kómek kórsetiledi.

Sondaı-aq, YDD Corporation kompanııasynda zardap shekkenderdi «jedel járdemmen» emes, qyzmettik kólikpen aýrýhanaǵa jetkizilgeni týraly túsinikteme berdi. Áleýmettik jelilerde zaýytta kúıip qalǵan jumysshylar qyzmettik Gazelmen aýrýhanaǵa jetkizilgeni týraly beınejazba paıda boldy. 

«Zaýyttyń qashyqtyqta ornalasýyna jáne shuǵyl kómek kórsetý qajettiligine baılanysty alǵashqy kómek kórsetý jáne zardap shekkenderdi zaýyt aýmaǵyndaǵy qyzmettik kólikte jedel jetkizý týraly sheshim qabyldandy. Kezekshi kólik zardap shekkenderdi Maqajanov atyndaǵy aýrýhanaǵa jetkizdi. Barlyq qajetti shuǵyl jáne ambýlatorııalyq kómek kórsetildi. Sonymen qatar, kompanııa qajetti medıtsınalyq kómek kórsetý úshin Reseıden eń jaqsy dárigerler tobynyń qysqa merzimde kelýin uıymdastyrdy. Jaqyn arada Túrkııadan dárigerler keledi dep josparlanyp otyr. Kompanııa zardap shekkenderge jan-jaqty kómek kórsetedi jáne aýrýhananyń medıtsınalyq qyzmetkerlerimen jáne zardap shekkenderdiń týystarymen únemi baılanysta bolady», - dep habarlady «YDD Corporation» baspasóz qyzmeti.

Esterińizge sala keteıik, keshe 20 shildede Qaraǵandyda ferroqorytpa zaýytynyń peshinde kenetten jalyn shyqty. TJ saldarynan kásiporynnyń segiz qyzmetkeri zardap shekti.