Ferroqorytpa zaýytyndaǵy apat - zardap shekkender týraly ne belgili

<p>QARAǴANDY. KAZINFORM &mdash; Ferroqorytpa zaýytyndaǵy apattan zardap shekkenderdi emdeý boıynsha jergilikti dárigerlerge keńes berý jáne kómek kórsetý úshin Reseı Federatsııasynyń jetekshi ınstıtýttary men aýrýhanalarynan kombýstologter keldi.</p>

«Qaraǵandyǵa Reseı Federatsııasy Densaýlyq saqtaý mınıstrligi Oral memlekettik medıtsına ýnıversıtetiniń apattar medıtsınasy kafedrasynyń dotsenti, medıtsına ǵylymdarynyń kandıdaty Vladımır Amosov bastaǵan alty dárigerden turatyn top keldi. Amosovtyń kúıikterdi emdeýde 40 jyldyq tájirıbesi bar jáne jetekshi kombýstologterdiń biri. Sonymen qatar, mamandarǵa F. I. Inozemtsev atyndaǵy qalalyq klınıkalyq aýrýhana kúıik ortalyǵynyń bólim meńgerýshisi Tımýr Halılýllovıch Sýhov keńes beredi. Sýhov — kúıikke shaldyqqan naýqastardy emdeýge mamandanǵan 25 jyldyq tájirıbesi bar travmatolog», — dep habarlady «YDD Corporation» JShS baspasóz qyzmeti.

Maqajanova atyndaǵy aýrýhananyń dárigerleri men mamandary reseılik áriptesterimen birge zardap shekkenderge jan-jaqty medıtsınalyq kómek kórsetip jatyr. Sonymen qatar, Izraıl men Túrkııadan kelgen jergilikti jáne sheteldik mamandarmen onlaın konsýltatsııalar júrgiziledi.

«Ázirge zardap shekkenderdiń jaǵdaıy ózgerissiz», — dep habarlady Qaraǵandy oblysynyń densaýlyq saqtaý basqarmasynyń baspasóz qyzmeti.

Esterińizge sala keteıik, 20 shilde kúni Qaraǵandydaǵy ferroqorytpa zaýytynda kútpegen jerden jalyn shyqqan bolatyn. Tótenshe jaǵdaı saldarynan kásiporynnyń segiz qyzmetkeri zardap shekti. Olar H.J. Maqajanov atyndaǵy kópsalaly aýrýhanada jatyr. QR Densaýlyq saqtaý mınıstrliginiń tapsyrmasy boıynsha qosymsha medıtsınalyq kómek kórsetý úshin Qaraǵandyǵa Oljas Bekarysov bastaǵan akademık N.D. Batpenov atyndaǵy Ulttyq travmatologııa jáne ortopedııa ǵylymı ortalyǵynyń qyzmetkerleri de keldi.