Ferroqorytpa zaýytyndaǵy apat: Arnaıy komıssııa jumys berýshiniń kinásin anyqtady

<p>ASTANA. KAZINFORM &mdash; 2024 jylǵy 20 shildede Qaraǵandy qalasynda ornalasqan &laquo;YDD Corporation&raquo; JShS ferroqorytpa zaýytyndaǵy adam shyǵyny oryn alǵan toptyq jazataıym oqıǵany tergeý úshin qurylǵan arnaıy komıssııa oqıǵanyń mán-jaıyn zerdelep, negizgi kiná jumys berýshide ekenin anyqtady.</p>

Eńbek jáne halyqty áleýmettik qorǵaý mınıstrliginen jazǵandaı, komıssııa músheleri tehnıkalyq qujattamany, oqıǵa bolǵan jerdi tekserý nátıjelerin, kýágerlerdiń saýalnamalaryn, saraptama uıymynyń qorytyndysyn, normatıvtik qujattar men basqa da materıaldardy zerdelegennen keıin osyndaı qorytyndyǵa keldi.

«Kásiporynda travmatıkalyq faktorlardyń áserin boldyrmaý úshin shuǵyl sharalar tıisti dárejede qabyldanbaǵany, qaýipsiz eńbek jaǵdaılary men qyzmetkerlerdiń erejelerdi, nusqaýlyqtardy jáne tehnologııalyq tártipti saqtaýyn baqylaý elementteri tıisti dárejede jasalmaǵany anyqtaldy. Komıssııa músheleri zardap shekkendermen jáne zardap shekkenderdiń otbasy múshelerimen kezdesti, olarǵa qoldanystaǵy zańnamaǵa sáıkes áleýmettik qorǵaýǵa zańdy quqyqtary túsindirildi.

Arnaıy komıssııanyń tergeý nátıjeleri jáne jınalǵan barlyq materıaldar bolǵan jazataıym oqıǵaǵa kináli dep tanylǵan adamdardy jaýapqa tartý úshin quqyq qorǵaý organdaryna beriletin bolady», — dep jazdy mınıstrlikten.

Sondaı-aq, komıssııa «YDD Corporation» JShS basshylyǵyna jazataıym oqıǵanyń sebepterin joıý jáne aldaǵy ýaqytta osyndaı jaǵdaılardyń aldyn alý jóninde sharalar keshenin qabyldaýǵa qaýly etti.

Jumys berýshiniń aqparatyna sáıkes, jumys berýshiniń mindettemelerine qatysty materıaldyq sıpattaǵy barlyq máseleler, sondaı-aq qaza tapqandar men zardap shekkenderdiń jaqyn týystaryna ózge de kómek kórsetý rettelgen.

Sonymen qatar, jumys berýshi zardap shekkenderdiń jaqyn týystaryna óteýsiz materıaldyq kómek kórsetti.

Esterińizge sala keteıik, 2024 jyldyń 20 shildesinde Qaraǵandy qalasynda «YDD Corporation» ferroqorytpa zaýytynda óndiriste jazataıym oqıǵa oryn alyp, nátıjesinde segiz jumysshy zardap shekti, olardyń tórteýi qaza tapty.