Ferroqorytpa zaýytynda qaza tapqan qyzmetkerdiń otbasyna on jyldyq jalaqysy tólenedi

<p>ASTANA. KAZINFORM - YDD Corporation kompanııasy Karaǵandydaǵy ferroqorytpa zaýytynda tótenshe jaǵdaıdan keıin qaza tapqan qyzmetkerdiń otbasyna qoldaý kórsetemiz dep ýáde berdi, dep habarlaıdy Kazinform agenttiginiń tilshisi.</p>

Búgin kompanııa qaıtys bolǵan Mýzafar Ismaılovtyń otbasy aldyndaǵy mindettemeleriniń tizimin jarııalady. Marqum ferroqorytpa zaýytyndaǵy peshte jalyn shyǵyp, denesin 85% kúıik shalǵan edi. Alǵan jaraqattary saldarynan ol tórtinshi kúni aýrýhanada qaıtys bolǵan.

“YDD Corporation Mýzafar Imantaıulynyń qaıtys bolýyna baılanysty onyń týystary men jaqyndaryna qaıǵyra otyryp, kóńil aıtady.⠀

Búgingi tańda kompanııa jerleýdi uıymdastyrý, as ótkizý jáne mazar salý boıynsha barlyq shyǵyndardy óz moınyna alady, sondaı-aq otbasyna barlyq qajetti qoldaýdy kórsetedi. Atap aıtqanda, kompanııa kelesi mindettemelerdi atqarady:

* Otbasyn qoldaý úshin 10 jyldyq jalaqy mólsherinde birjolǵy tólem jasaıdy.
* Otbasynyń turǵyn úı jaǵdaıyn jaqsartýǵa kómek kórsetedi.
* Qyzmetker men onyń jubaıynyń barlyq nesıelerin tolyq óteıdi”, - dep málimdedi kompanııanyń baspasóz qyzmetinde.

Muzafar Ismaılovtyń janazasy búgin Qaraǵandy oblysy Buqar jyraý aýdany Úmitker aýylynda shyǵaryldy. Marqumnyń sońynda úsh jasar qyzy men birge endi tolǵan uly qaldy.

Esterińizge sala keteıik, 20 shildede Qaraǵandyda ferroqorytpa zaýytynyń peshinde kenetten jalyn shyqty. TJ saldarynan kásiporynnyń segiz qyzmetkeri zardap shekti. Olar Professor H.J.Maqajanov atyndaǵy kópsalaly aýrýhanasyna jatqyzyldy. QR Densaýlyq saqtaý Mınıstrliginiń tapsyrmasy boıynsha qosymsha medıtsınalyq kómek alý úshin Qaraǵandyǵa Akademık N.D.Batpenov atyndaǵy Ulttyq Travmatologııa jáne ortopedııa ǵylymı ortalyǵynyń qyzmetkerleri keldi.⠀