Fermerlik jylyjaılardyń elektr jáne gaz shyǵyndaryn óteý qarastyrylady

ASTANA. QazAqparat - Jylyjaı sharýashylyqtarynyń maýsymaralyq kezeńde elektr energııasy men gaz shyǵyndary sýbsıdııalanatyn bolady, dep habarlaıdy QazAqparat.

Tıisti sheshimdi AShM bıznes tarapynan túsken usynystardy eskere otyryp qarastyryp jatyr.

«Bıýdjet qarajatyn tıimdi jumsaý, sondaı-aq barlyq agrotehnologııalardy saqtaıtyn jylyjaılardy qoldaý maqsatynda sýbsıdııa alýdyń negizgi talaby retinde óndiris tehnologııalaryna sáıkestik sertıfıkatynyń bolýy talap etiledi. Ulttyq standart 2023 jyldyń 1 mamyrynda bekitilip, kúshine endi.

Qazirgi ýaqytta AShM ákimdikterdiń qaýlysymen bekitilgen sýbsıdııalar normalary boıynsha 1 ga. shyǵystardy óteýdi kózdeıtin sýbsıdııalaý qaǵıdalaryna tıisti ózgerister ázirledi. AÓK ekonomıkasy jáne aýyldyq aýmaqtardy damytý QazǴZI-da jabyq topyraqta kókónis óndirý shyǵyndarynyń ǵylymı esepteýleri júrgizildi, olar boıynsha ortasha kórsetkishter esepteletin bolady«, - dep jazdy mınıstrlikten.

Osylaısha, óndiristik jylyjaılar ǵana emes, óndiris standarttaryna sáıkes keletin fermerlik keshender de osy baǵyt boıynsha sýbsıdııalaýǵa quqyly bolady.

Buıryqtyń jobasy kelisimge jiberildi, jaqyn arada ony bekitý josparlanyp otyr.

Aıta keteıik, atalǵan qoldaý sharalarynan bólek, qazaqstandyq jylyjaıshylar tyńaıtqyshtardy (organıkalyq zattardy qospaǵanda), pestıtsıdterdi, bıoagentterdi (entomofagtardy) jáne bıoagentti, sondaı-aq sýarmaly sýdy, qııar men qyzanaq tuqymyn satyp alýǵa sýbsıdııa alýǵa úmitker bola alady.

Sonymen qatar, jylyjaı keshenderin salý jáne keńeıtý kezinde shyǵyndardyń 25% óteý qarastyrylǵan. Nátıjelerdi ulǵaıtý úshin qazirgi ýaqytta normatıvti 30% deıin arttyrý boıynsha jumystar júrgizilip jatyr.

2022 jyldyń qorytyndysy boıynsha respýblıkada 1 225 ga alańda jabyq topyraq qurylystary jumys istedi, onyń 219 ga ónerkásiptik jylyjaı jáne 1006 ga fermerlik jer.