Fermerlerdiń 90%-y gosagro.kz júıesi arqyly tıisti tólemderdi ala almady – depýtat

ASTANA. QazAqparat – Aýyl sharýashylyǵy mınıstrliginiń jetilmegen júıeni iske qosyp, jaýapsyz sheshimi saldarynan el aýqymynda 40 myńnan astam sharýa zardap shegýi múmkin. Atalǵan máseleni Májilis depýtaty Aıdarbek Hodjanazarov kóterdi, dep habarlaıdy QazAqparat tilshisi.

«Aýyl sharýashylyǵy mınıstrliginiń málimetine sáıkes búginde sýbsıdııalaýdyń biryńǵaı memlekettik aqparattyq júıesi arqyly 6,1 mlrd teńgege 1,5 myń ótinim maquldanǵan. Al ótken jyly 57,5 mlrd teńgege maquldanypty. Osylaısha ótken jylmen salystarǵanda nebári 10 paıyzdan asa soma ǵana tólengenin kórip otyrmyz. Bul degenimiz fermerlerdiń 90%-y gosagro.kz júıesiniń jumysynan tıisti tólemderdi ala almady. Sonymen qatar 51,4 mlrd teńge el ekonomıkasyn tolyqtyrǵan joq», - Aıdarbek Hodjanazarov Májilistiń agrarlyq máseleler komıtetiniń otyrysynda.

Onyń aıtýynsha, bul jyl basyndaǵy jaǵdaı, eger júıe jumysy osy jalǵasatyn bolsa, 12 aıdyń qorytyndysy boıynsha gosagro.kz 287 mlrd teńgeniń (2022 jylǵy kólem) nebári 31 mlrd teńgesin ǵana tólep úlgeredi.

«Kópshiligińiz úshin bul jaı ǵana sandar bolýy múmkin, biraq osy qarajatqa muqtaj jandar, bıznes kózderi men jumys oryndary bar. Olardyń sany qansha? 40 myńnan astam aýyl sharýashylyǵyn óndirýshi boljamdy túrde 256 mlrd teńge kólemindegi tıisti tólemin ala almaı qalady. Aýyl sharýashylyǵy mınıstrliginiń naryqqa jetilmegen júıeni iske qosý boıynsha jaýapsyz sheshimi saldarynan el aýqymynda 40 myńnan astam sharýa zardap shegedi», - deıdi ol.

Sondaı-aq, halyq qalaýlysy, gosagro.kz júıesi 60 mlrd teńge somasynda 1,8 myń ótinimdi nemese qarjylandyrý kóleminiń 37 paıyzyn keri qaıtarǵanyn aıtty.

«Qalyptasqan tájirıbe keri qaıtaralǵan ótinimder kólemi 1 paıyzdan aspaýy tıis ekenin kórsetedi. Bul másele de júıeniń jumysyna qatysty», - dep tolyqtyrdy A. Hodjanazarov.