Fermerlerden astyqty satyp alý baǵasy qashan jarııalanady

NUR-SULTAN. QazAqparat – QR Aýyl sharýashylyǵy mınıstri Erbol Qarashókeev Azyq-túlik korporatsııasy satyp alatyn astyq baǵasy qashan jarııalanatynyn aıtty, dep habarlaıdy QazAqparat tilshisi.

Búgin Úkimet otyrysynda QR Premer-Mınıstri Álıhan Smaıylov mınıstrden: «Azyq-túlik korporatsııasy satyp alatyn astyqtyń baǵasyn qashan jarııalaısyzdar?», - dep suraǵan edi.

«Bıyl 1,1 mln tonna ónimdi satyp alamyz dep kelisimshartqa qol qoıdyq. Onyń ishinde 900 myń tonna bıdaı, 110 myń tonna arpa bar. Negizi baǵany 15 qyrkúıekte jarııalaımyz dep josparlap otyrmyz. Sebebi, osy 15 qyrkúıekke deıin bizde jáne basqa da elderde túsim boljamy túpkilikti aıqyndalady jáne naryq konıýktýrasy da túsinikti bolady. Osy merzimde fermer úshin obektıvti baǵa usyný múmkindigi týady», - dep jaýap berdi Erbol Qarashókeev.