Fermerlerden astyq satyp alýǵa qosymsha qarajat bólinedi - mınıstr

<p>ASTANA. KAZINFORM &mdash; Aýyl sharýashylyǵy mınıstri Aıdarbek Saparov Azyq-túlik korporatsııasy arqyly sharýalardan astyqty tikeleı satyp alý josparyna túsinik berdi.</p>

«Bul turǵyda Memleket basshysy tapsyrma berdi. Erteń Úkimet otyrysynda Azyq-túlik korporatsııasy arqyly fermerlerden tikeleı astyq satyp alý taqyrybyn talqylaımyz. Bastapqy 10 mlrd teńgeni bólýdi Qarjy mınıstrligi daıyndap jatyr. Osy qarajatqa satyp alýdy bastaı beremiz. Ary qaraı taǵy qosymsha qarajat bólinedi», - dedi A. Saparov Parlament Májilisinde bıylǵy astyqty ótkizý máselesin talqylaýǵa arnalǵan jıynnan keıin tilshiler suraǵyna jaýap bere otyryp.

Onyń aıtýynsha, Azyq-túlik korporatsııasyndaǵy jınaqtalǵan bıdaı satylǵannan keıin, osy bosaǵan qarajat ta fermerlerdi qoldaýǵa baǵyttalady.

«Dál qazir sharýalardan qansha astyq tikeleı satyp alynatynyn kún buryn aıta almaımyn. Erteń Úkimette sheshim qabyldanǵannan soń, jalpy kólemi jarııalanady», - dedi mınıstr.

Eske salsaq, jaqynda Prezıdent Úkimetke Azyq-túlik korporatsııasy arqyly sharýalardan astyq satyp alýdy tapsyrdy. 

Buǵan deıin habarlanǵandaı, Premer-mınıstrdiń orynbasary Serik Jumanǵarın Qazaqstan astyǵy qaı elderge eksporttalatynyn túsindirdi.