Fermerlerdi qoldaý úshin barlyq qajetti shara qabyldandy – Asaıyn Baıhanov
«Oblys fermerleri úshin aǵymdaǵy maýsym ońaı bolǵan joq. Aýa raıynyń qolaısyzdyǵy óz áserin tıgizbeı qoımady. Osyǵan baılanysty biz fermerlerdi qoldaý jáne qurǵaqshylyqtyń saldaryn azaıtý úshin barlyq qajetti sharalardy qabyldadyq. Jergilikti bıýdjetten fermerlerdiń jem-shóp daıyndaýǵa jumsaǵan shyǵyndarynyń qunyn arzandatý úshin 3 mlrd teńge bólindi. Memlekettik kómekti 1,5 myńnan astam fermer aldy. Shóp shabý úshin arzandatylǵan dızel otynynyń kólemi 4-ten 10 myń tonnaǵa deıin ulǵaıtyldy. Jeńildikti baǵa – 232 teńge, bul dızel otynynyń naryqtyq qunynan 21 paıyzǵa tómen», - dedi óńir ákimi Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, shóp daıyndaý úshin memlekettik orman qory jerlerinen aýdany 25 myń gektardan asatyn qosymsha shabyndyq alqaptar bólindi. Bul shamamen 20 myń tonna shóp daıyndaýǵa múmkindik berdi. «Pavlodar» ÁKK janynan maldy qolda ustaıtyn kezeńde halyqqa satý úshin 5 myń tonna kóleminde jemdik astyqty turaqtandyrý qory quryldy. Úkimettiń qoldaýymen respýblıkalyq bıýdjetten ınvestıtsııalyq shyǵyndardy, tuqymdardy, pestıtsıdterdi, tyńaıtqyshtardy, mal sharýashylyǵy boıynsha asyl tuqymdy jáne selektsııalyq jumystardy sýbsıdııalaýǵa 6,8 mlrd teńge bólindi.
«Qurǵaqshylyqqa baılanysty oblystyń 38 sharýashylyǵyna 1,3 mlrd teńge somaǵa saqtandyrý tólemderi berildi. Qarjy ınstıtýttarymen 95 qaryzdy qaıta qurylymdaý jáne uzartý máseleleri pysyqtaldy. Aldaǵy qysqy kezeńge oblys aýdandarynda 1,2 mln tonna shóp daıyndaldy», - dedi ol.