Fermeler úshin dızeldiń baǵasy qansha bolady

NUR-SULTAN. QazAqparat – QR Energetıka mınıstri Bolat Aqsholaqov fermeler úshin kóktemgi dızeldiń baǵasy qansha bolatynyn atady, dep habarlaıdy QazAqparat tilshisi.

«Búgingi kúni Energetıka mınıstrligi Aýyl sharýashylyǵy mınıstrligimen birlesip «Oblystardy munaı óńdeý zaýyttaryna kóktemgi egis jumystary úshin dızel otynyn jetkizý boıynsha bekitý grafıgin» bekitedi. Onyń sheńberinde aýyl sharýashylyǵy taýaryn óndirýshiler úshin qajettilik 400,26 myń tonna kóleminde bekitildi», - dedi Energetıka mınıstri.

Aıtýynsha, bul bekitilgen grafık Aýyl sharýashylyǵy mınıstrligi atynan oblys ákimdikteriniń aýyl sharýashylyǵy basqarmalaryna jáne Energetıka mınıstrliginiń atynan resýrs ustaýshylarǵa jiberilgen. Sondaı-aq, ol bıyl fermerlerge qajet dızeldiń quny qandaı bolatynyn aıtty.

«Memleket basshysynyń tapsyrmasyna sáıkes Mınıstrlik aýyl sharýashylyǵy taýaryn óndirýshiler úshin dızel otynyn jetkizýge qatysatyn negizgi resýrs ustaýshylarmen keńester ótkizdi, olardyń qorytyndysy boıynsha 2022 jylǵy kóktemgi egis jumystaryn júrgizý úshin dızel otynyna usynylatyn baǵa tonnasyna 212 myń teńgeni quraıdy. Basqasha aıtatqanda, bul bir lıtrine 176 teńge degen sóz.

Jetkizý men saqtaýdy eskere otyryp, aýyl sharýashylyǵy taýaryn óndirýshiler úshin boljamdy baǵa shekti bekitilgen bólshek saýda baǵalarynan tómen. Bul bul ortasha alǵanda 15%dan 30%-ǵa deıin arzan.

Aıta ketý kerek, Energetıka mınıstrliginde aýyl sharýashylyǵy taýaryn óndirýshileri úshin dızel otynyna arzandatylǵan baǵalardy zańnamalyq bekitý quzyreti joq.

Aýyl sharýashylyǵynyń muqtajdyqtary úshin dızel otynynyń quny janar-jaǵarmaı materıaldary naryǵyna qatysýshylarmen kelisim jolymen aıqyndalady jáne munaı ónimderin resýrs ustaýshylardyń ózderi erikti túrde belgileıdi.

Mınıstrlik kóktemgi egis jumystaryn turaqty júrgizý úshin jan-jaqty sharalar qabyldaýda», - dedi Bolat Aqsholaqov.