Fashızmnen qorǵap qalǵandaryńyz úshin búkil álem sizderge boryshtar - Elbasy
Qazaqstan Prezıdenti marapatqa usynylǵandardyń bári de eren eńbegimen, qaltqysyz qyzmetimen erekshelengen jandar ekenin atap ótti. - Bıyl Uly Otan soǵysy men tyl ardagerlerine táýelsiz eldiń tól nagradalary tapsyrylady. Búgingi urpaq Uly Jeńisti alyp bergen aǵa býyn aldynda árqashan qaryzdar. Memleket basshysy retinde men búkil el atynan Sizderge myń alǵys aıtamyn, ardaqty ardagerler, - dedi Memleket basshysy. Nursultan Nazarbaev er-azamatqa týǵan Otandy, qasterli táýelsizdikti qorǵap, el tynyshtyǵyn kúzetýden asqan mártebe joq ekenin aıtty. - Sizder sol abyroıly boryshty adal atqardyńyzdar jáne atqaryp kelesizder. Sizder soǵystan keıin de elge qyzmet etýdi jalǵastyryp, beıbit kúnde de batyrlyqqa oryn bar ekenin qapysyz dáleldeı bildińizder. Qoǵamda turaqtylyq pen tártiptiń saqtalýy da myna sizderdiń eńbekterińizge tikeleı baılanysty, - dedi Qazaqstan Prezıdenti. Memleket basshysynyń aıtýynsha, eldiń ómirinde Otan qorǵaýshy erdiń orny qashanda erekshe. - Ulttyq ásker - egemen eldiń qurysh qalqany. Onyń basty mindeti - ult pen ulystyń qaýipsizdigin qamtamasyz etý. Búginde shekaramyzdyń qaýipsizdigi men halqymyzdyń amandyǵyn senimdi sarbazdar kúzetip tur. Olar ata-babalardyń erlik dástúrin laıyqty jalǵastyryp, aǵa býyn amanatyna adal bolady dep senemin. Elge qorǵan bolý úshin er-azamatqa qajymas qaırat, asqaq rýh qajet ekeni anyq. Sizderdiń boılaryńyzdan sonyń bári tabylady, - dedi Nursultan Nazarbaev. Qazaqstan Prezıdenti memlekettik nagradalar tapsyrý rásimi eki birdeı mańyzdy merekeniń qarsańynda ótip otyrǵanyna nazar aýdardy. - Búgin oǵan eldiń bostandyǵy men beıbit ómirin qorǵap qalǵan ardagerler qatysyp otyr. Biz sizderge «Barys» jáne «Qurmet» ordenderin tapsyramyz. Bul - búgingi urpaq sizderge usyna alatyn syı-qurmettiń tıtteı bir bólshegi ǵana. Búkil el, búkil álem fashızmnen qorǵap qalǵandaryńyz úshin sizderge boryshtar. Ardagerlerdi marapattaý úzilmes urpaq sabaqtastyǵyn aıǵaqtaıdy. Sizderdiń maıdan dalasy men beıbit ómirdegi erlikterińiz árdaıym batyrlyq pen patrıotızm úlgisi bolyp qala bermek. Uly Jeńiske qol jetkizgenderdiń barlyǵy úshin eń úzdik marapat - táýelsiz Qazaqstan, órkendeý ústindegi elimiz, azamattarymyzdyń baqýat ómiri. Bul sizderdiń erlikterińizdiń beker ketpegenin dáleldeıdi. Búginde sizderdiń isterińizdi qazaqstandyqtardyń jańa urpaǵy tabysty jalǵastyrýda. El olardyń da eńbegin baǵalaıdy, - dedi Nursultan Nazarbaev. Qazaqstan Prezıdenti búgin ordender men medaldar tapsyrylatyndardyń qatarynda túrli salalar men uıymdardyń ókilderi bar ekenin atap ótti. - Barshańyzdy beıbit ári baqýatty Qazaqstandy damytýǵa qosqan zor úles biriktiredi. Qazir, beıbit ýaqytta sizder táýelsizdikti kúzetesizder, el shekarasyn, turaqtylyqty, tynyshtyq pen respýblıkamyzdaǵy zańdylyqtyń saqtalýyn qorǵaısyzdar. Sizderdiń ómirlerińiz tutastaı Otanǵa qyzmet etýge arnalǵan. Men sizderge nagradalardy rızashylyqpen tapsyramyn, - dedi Memleket basshysy. Nursultan Nazarbaev rásimge qatysýshylardy taǵy da quttyqtap, olarǵa zor densaýlyq pen tabys tiledi. Marapattalǵan ardagerler Memleket basshysyna qamqorlyǵy úshin sondaı-aq elimizdegi tatýlyq pen tynyshtyqty qamtamasyz etip otyrǵany úshin alǵys aıtty. Rásim barysynda ІІІ dárejeli «Barys» ordenimen soǵys ardageri S.Jıenbaev (Almaty qalasynan), soǵys jáne eńbek ardageri S.Isaev (Almaty oblysynan); «Qurmet» ordenimen soǵys ardageri M.Abdrahmanov (Oral qalasy), soǵys ardageri Z.Ádilbekov (Almaty qalasy), soǵys ardageri Q.Ámrenov (Pavlodar qalasy), soǵys ardageri Q.Bekenov (Astana qalasy), soǵys ardageri B.Boqaev (Mańǵystaý oblysy), V.Bolotın (Qaraǵandy oblysy), soǵys ardageri K.Brezgovın (Qostanaı oblysy), eńbek ardageri A.Daýylbaev (Soltústik Qazaqstan oblysy), soǵys ardageri M.Domovets (Shyǵys Qazaqstan oblysy), soǵys ardageri A.Elýbaev (Atyraý oblysy), soǵys ardageri O.Jalmaǵambet (Aqtóbe qalasy), soǵys ardageri Sh.Janybekov (Almaty qalasy), soǵys ardageri S.Jaryqbasov (Almaty oblysy), soǵys ardageri R.Jıtkovskaıa (Almaty qalasy), soǵys ardageri I.Qalıev (Qyzylorda qalasy), soǵys ardageri I.Qurbanov (Jambyl oblysy), soǵys ardageri M.Poltaratskaıa (Astana qalasy), soǵys ardageri J.Ramazanov (Kókshetaý qalasy), soǵys ardageri S.Shámenov (Ońtústik Qazaqstan oblysy) marapattaldy. Sonymen qatar, II dárejeli «Dańq» ordenimen QR Qarýly Kúshteri Bas shtaby bastyǵynyń birinshi orynbasary R.Álimov, Astana qalasynyń prokýrory S.Bekbosynov, Qostanaı oblysy ishki ister departamentiniń bastyǵy T.Mátkenov, QR Memlekettik kúzet qyzmeti bastyǵynyń orynbasary Q.Orazqulov, QR Memlekettik qyzmet isteri jáne sybaılas jemqorlyqqa qarsy is-qımyl agenttigi apparatynyń basshysy A.Shaıymova; ІІ dárejeli «Aıbyn» ordenimen QR Bas prokýratýrasynyń departament bastyǵy R.Dosymbekova, QR Ulttyq qaýipsizdik komıteti Shekara qyzmetiniń 1-avıatsııalyq bazasynyń ushý daıyndyǵy komandıriniń orynbasary M.Kaýshenov, QR Qorǵanys mınıstrligi №44803 áskerı bóliminiń komandıri N.Qabaqov, QR Qarýly Kúshteri Qurlyq áskerleri Bas qolbasshysy basqarmasy bas shtaby bastyǵynyń orynbasary - jedel bas basqarmanyń bastyǵy A.Stepanenko; ІІІ dárejeli «Aıbyn» ordenimen QR Qarýly Kúshteri Áýe qorǵanysy kúshteriniń serjanty - Áýe qorǵanysy kúshteri bas qolbasshysy basqarmasynyń bólim bastyǵy S.Shorahanov; «Erligi úshin» medalimen QR Ulttyq qaýipsizdik komıteti Shekara qyzmeti Jaǵalaý kúzeti óńirlik basqarmasy «Saqshy» shekara kemesiniń komandıri E.Kalıshev, QR Іshki ister mınıstrliginiń Qaraǵandy oblysy Іshki ister departamentiniń ınspektory E.Sadyqbekov, QR Qorǵanys mınıstrligi №28079 áskerı bólimi arnaıy maqsattaǵy desanttyq-shabýyldaýshy rotasynyń aǵa radıotelefonshysy S.Sarmyrzaev, QR Іshki ister mınıstrligi Tótenshe jaǵdaılar komıtetiniń Soltústik Qazaqstan oblysy Tótenshe jaǵdaılar departamentiniń aǵa ınjeneri S.Seıfýllın; «Jaýyngerlik erligi úshin» medalimen QR Memlekettik kúzet qyzmeti Obektilerdi qorǵaý qyzmeti №0112 áskerı bólimi qurmet qaraýyly rotasynyń komandıri A.Elamanov, QR Qorǵanys mınıstrligi №62064 áskerı bóliminiń komandıri Sh.Jarylqasynov, QR Ulttyq qaýipsizdik komıteti «Arystan» qyzmeti bastyǵynyń orynbasary D.Jumabekov, QR Ulttyq ulany «Batys» óńirlik qolbasshylyǵynyń ofıtseri S.Qabdyqulov, QR Qorǵanys mınıstrligi №29011 áskerı bólimi shtab bastyǵynyń orynbasary - shtab jedel bólimshesiniń D.Qaıroshev marapattaldy.