Farmatsevtıka salasyn damytý jol kartasy ázirlenip jatyr

NUR-SULTAN. QazAqparat – Farmatsevtıka salasyn damytýdyń 2025 jylǵa deıingi jol kartasy ázirlenip jatyr. Bul týraly halyqqa esep berý kezdesýinde QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Dezınfektsııalaıtyn quraldar men mıneraldy tyńaıtqyshtarǵa suranystyń artýy hımııa ónerkásibi óndirisiniń kólemin arttyrdy. Ósim 11 paıyz boldy. Salany damytý maqsatynda «Atameken» ulttyq kásipkerler palatasymen jáne memlekettik organdarmen birlesip farmatsevtıka salasyn damytýdyń 2025 jylǵa deıingi jol kartasyn ázirlep jatyrmyz», - dedi Beıbit Atamqulov.

Onyń atap ótýinshe, farmatsevtıkalyq ónerkásipte 4 aıdyń qorytyndysynda óndiris kólemi 26 paıyzǵa ósken.

«Búgingi tańda farmatsevtıka kásiporyndarymyz ishki naryqty koronavırýstan emdeýge arnalǵan dárilik zattardyń usynylǵan 44 ataýynyń 22 túrin qamtamasyz etedi. Sondaı-aq jeke qorǵanysh quraldaryn óndirip jatyr», - dedi mınıstr.