Farmatsevtıka naryǵyndaǵy qazaqstandyq óndirýshilerdiń úlesi qansha

NUR-SULTAN. QazAqparat – Farmatsevtıka naryǵyndaǵy 765,3 mlrd teńgeniń 121,1 mlrd teńgesin ǵana qazaqstandyq óndirýshiler ıgerip otyr. QR Densaýlyq saqtaý mınıstri Ajar Ǵınııat vedomstvonyń keńeıtilgen alqa otyrysynda osyndaı derek keltirdi, dep habarlaıdy QazAqparat tilshisi.

Mınıstrdiń aıtýynsha, bıyldyń ózinde salada ımportty almastyrýdy arttyrý sheńberinde mynadaı sharalar kózdelgen:

dárilik zattar men medıtsınalyq buıymdardy shyǵarý boıynsha keminde 5 jańa óndiristi iske qosý;

onyń ishinde: Big Pharma-ny tarta otyryp, otandyq farmatsevtıkalyq ónimdi halyqaralyq taný úshin Ulttyq retteýshini damytý;

dári-dármekter men medıtsınalyq buıymdar aınalysynyń barlyq protsesterin tsıfrlandyrý; Dárilik zattardy tańbalaý men olardyń baqylanýyn engizý.

«Biryńǵaı dıstrıbıýtor arqyly dárilik zattar men medıtsınalyq buıymdardy satyp alýdyń jalpy kólemindegi otandyq óndiristiń úlesi 37%-ǵa deıin ósýi kerek. Qazirgi tańda eldegi farmatsevtıka naryǵynyń jalpy kólemi 765,3 mlrd teńgeni quraıdy. Onyń ishinde otandyq taýar óndirýshiler 121,1 mlrd teńgeniń ónimin jetkizip otyr. Biryńǵaı dıstrıbıýtor arqyly satyp alý kólemi 244,9 mlrd teńgeni, otandyq taýar óndirýshilerden 90,6 mlrd teńgeni qurady», - dedi vedomstvo basshysy.

Mınıstrdiń málimeti boıynsha, medıtsına salasynda 88 otandyq taýar óndirýshi jumys istep otyr. Onyń ishinde 32 dárilik zattardy óndirýshi, 56 medıtsınalyq buıymdar men tehnıka óndirýshi bar.

«Dárilik zattar men medıtsınalyq buıymdar tizbesine sáıkes, biryńǵaı dıstrıbıýtor dárilerdiń 91%-yn satyp aldy. Bul dárilik zattar men medıtsınalyq buıymdardyń 1 496 pozıtsııasy degen sóz. Qazirgi tańda biryńǵaı dıstrıbıýtordyń qoımalaryna 1 346 pozıtsııa nemese 90% tústi.

Sondaı-aq 2021 jyly Biryńǵaı dıstrıbıýtor jalpy somasy 33 mlrd teńgege 459 ataý boıynsha dárilik zattar men medıtsınalyq buıymdardyń azaıtylmaıtyn qoryn satyp aldy», - dedi Ajar Ǵınııat.