Farmatsevtıka ınspektorlarynyń qyzmeti jetildiriledi
«Densaýlyq saqtaýdyń tıimdi júıesin qurýdyń negizgi sharttarynyń biri - salany básekege qabiletti mamandarmen, qajetti ǵylymı zertteýlermen jáne ınnovatsııalarmen qamtamasyz etý. Medıtsına kadrlarynyń deńgeıin kóterý maqsatynda bilim berýdiń úzdiksiz ıntegratsııalanǵan modelin, bilim alýshylardyń táýelsiz baǵalanýyn jáne túlekterdiń kásibı daıarlyǵyn engizý kózdeldi. Kodekstiń jobasy bıobankterdiń, bıoetıkalyq komıssııalardyń qurylýy men paıdalanylýyn jáne etıka máseleleri jónindegi komıssııalardyń róli men mártebesin retteıdi», - dedi mınıstr.
Onyń sózine qaraǵanda, medıtsına bilim berý uıymdarynda strategııalyq áriptestikti, ýnıversıtet klınıkalary men biriktirilgen akademııalyq medıtsına ortalyqtarynyń jumysyn odan ári damytý kózdeledi.
«Nátıjesinde, medıtsına kadrlaryn daıarlaý sapasy artady, qoldanbaly jáne irgeli zertteýlerdiń damýy qamtamasyz etiledi, gendik ınjenerııa men derbestendirilgen medıtsınanyń damýyna múmkindik beriledi», - dep túsindirdi E. Birtanov.
Sonymen qatar mınıstr Tegin medıtsınalyq kómek pen Mindetti áleýmettik medıtsınalyq saqtandyrý júıesinde halyqqa dárilik zattardy tańdaý múmkindigin berý maqsatynda birlesip tóleý máseleleri rettelgenin jetkizdi.
«Patsıent óz erki boıynsha dárilik zattyń baǵasynyń aıyrmashylyǵyn tólep, qalaǵan dárini satyp alýǵa múmkindik ashylady. Sondaı-aq Kodeks jobasynda dárilik zattar men medıtsınalyq buıymdardyń aınalysy salasyndaǵy baqylaýdy júzege asyratyn farmatsevtıka ınspektorlarynyń qyzmetin jetildirý kózdelgen. Olardyń qyzmeti densaýlyq saqtaý salasyndaǵy zańnamanyń buzylýynyń aldyn alýǵa, anyqtaýǵa jáne jolyn kesýge baǵyttalǵan», - dedi vedomstvo basshysy.
Budan buryn habarlanǵandaı, Parlament Májilisiniń jalpy otyrysynda «Halyq densaýlyǵy jáne densaýlyq saqtaý júıesi týraly» kodeks jobasy birinshi oqylymda maquldandy.