Farhad Qýanǵanov: Astanaǵa Elbasynyń esimin berý el damýynyń jańa deńgeıin anyqtaıdy
«Qazirgi tańda Qazaqstan halqy tarıhı sátti bastan ótkerýde. Soǵan sáıkes ár qazaqstandyq óziniń saıası, azamattyq kózqarasyn bildirýi tıis. Sebebi, mundaı jaǵdaı tarıhta óte sırek bolady», - degen Farhad Qýanǵanov osyndaı jaıttyń AQSh, Italııa, Reseı sııaqty elderdiń tarıhynda bolǵanyna nazar aýdardy.
Sondaı-aq ol Astanaǵa Elbasynyń esimin berý el damýynyń jańa deńgeıin anyqtaıtynyn aıtty.
«Astanamyzǵa Elbasynyń, Tuńǵysh Prezıdenttiń esimin bere otyryp, biz aldaǵy jyldar men ǵasyrlarǵa jalǵasatyn el damýynyń jańa trendin qalyptastyramyz. Sebebi, biz bas qalaǵa táýelsiz Qazaqstannyń negizin qalaýshy, halyqtyń ǵasyrlar boıǵy armanyn júzege asyrǵan, Qazaqstandy álemge abyroıly, syıly memleket retinde tanytqan, qazaqstandyqtardyń jan-jaqty damýyna jáne qoǵamymyzda beıbitshilik pen kelisimniń saltanat qurýyna barlyq jaǵdaıdy jasaǵan tulǵanyń atyn berý arqyly Elbasy saıasatyn ózimizdiń aldaǵy baǵyt-baǵdarymyz retinde aıqyndap otyrmyz», - dedi Farhad Qýanǵanov.
Odan bólek, «Nur Otan» partııasynyń Hatshysy álemdik deńgeıdegi memlekettiń negizin qalaýshy tulǵalar týraly da aıtyp ótti.
«Osy rette men Atatúrk, Lı Kýan ıÝ, Mahathır Mohammad, Djordj Vashıngton, І Petr sııaqty tarıhı tulǵalardy eske túsirgim keledi. Óıtkeni olar óz elderiniń ósip-órkendeýine tyń serpin bergen damýdyń etalony bolyp sanalady. Bizdiń Elbasymyz da dál sol bıiktegi biregeı tulǵa. Sondyqtan Astanaǵa Táýelsiz Qazaqstannyń Tuńǵysh Prezıdenti, Elbasynyń atyn berý bárimiz úshin jáne bolashaq urpaq úshin de óte mańyzdy dep esepteımin. Sebebi dál osy oqıǵa Qazaqstannyń ulylyǵyn kórsetedi», - dedi «Nur Otan» partııasynyń ókili.
Sonymen qatar ol bul máseleniń Qazaqstannyń Ata zańyna tolyǵymen saı ekenin jáne onyń Parlament Senaty men Májilisiniń, Úkimettiń, sondaı-aq, Prezıdenttiń Konstıtýtsııamen bekitilgen quziretine de sáıkes keletinin jetkizdi.