Factcheck.kz & Meta seriktestigi neni bildiredi

<p>ASTANA. KAZINFORM &ndash; Búgin qazaqstandyq Factcheck.kz saıtynyń aqparatty tekserý boıynsha Meta kompanııasynyń seriktesi atanǵany belgili boldy. Bul Meta platformalaryn qoldanýshylardyń senimdi aqparat tutynýy úshin jasalyp otyrǵan qadam. Osy oraıda agenttik tilshisi Factcheck.kz saıtynyń bas redaktory Dýman Smaqovtan jańa kelisimniń mán-jaıyn surap bilgen edi.</p>

«Meta kompanııasymen seriktestik korporatsııaǵa tıesili áleýmettik jelilerde taralǵan jalǵan nemese jartylaı jalǵan aqparattardy áshkereleýge múmkindik beredi. Mysaly, Facebook-te aqparat jarııalanyp, ol jalǵan bolyp shyqsa, jazbanyń astyna arnaıy belgi qoıylady, osylaısha jeli oqyrmandaryna jalǵan aqparat taralyp jatqany eskertiledi. Sonymen qatar jelidegi jazbany odan ári taratqan adamǵa «siz jalǵan aqparatty taratyp jatyrsyz» degen eskertý habarlama keledi. Jalǵan aqparat taratýdyń taǵy bir keri saldary, qoldanýshynyń jelidegi belsendiligi tómendeıdi, ıaǵnı jarnama berý múmkindigine, monetızatsııa jasaýǵa jáne aqparatty taratý múmkindigine shekteý qoıylady. Sol sııaqty qaralym da azaıady», - dedi Dýman Smaqov.

Onyń aıtýynsha, jalǵan aqparattardy taratqan jeli qoldanýshylaryna aldymen eskertý jasalady, ıaǵnı úzildi-kesildi shekteý qoıylmaıdy.

«Biz buǵan deıin de jalǵan aqparattarmen kúresip, olardy anyqtaýmen aınalysyp kelemiz, endi jumysty Meta kompanııasymen birlese otyryp júrgizemiz. Korporatsııaǵa qarasty Facebook, Instagram jáne Threads jelilerinde jeke kabınetter bolady, sol jerde jalǵan aqparattarǵa belgi qoıylyp otyrady. Ázirge bul tizimde WhatsApp jelisi joq, aldaǵy ýaqytta qosylady degen oıdamyz. Bul jerde azamattardyń jeke málimetterine qatysty qaýip joq, aqparat qaýipsizdigi buzylmaıdy. Sebebi bizge jeli qoldanýshylardyń jeke akkaýnttary qoljetimsiz. Jalpaq tilmen aıtqanda, biz jarııalanǵan jazbanyń ras, ótirigin ǵana anyqtaımyz. Bireýdiń jeke basyna qatysty maqsat, múdde kózdelmeıdi», - deıdi ol.

Odan bólek, Factcheck.kz resýrsynyń bas redaktory jelide jarııalanǵan jalǵan kontentterdi óshirý quqyǵy joqtyǵyn aıtty.

«Biz jelige shyqqan jalǵan aqparattardy óshirýmen aınalyspaımyz, Meta kompanııasynyń dezınformatsııa boıynsha seriktesimiz, al jaǵdaılar boıynsha biz resmı seriktes emespiz. Taǵy bir aıta ketetin jaıt, ekijaqty kelisim uzaqmerzimdi», - deıdi D. Smaqov.

Aıta keteıik, buǵan deıin Factcheck.kz aqparatty tekserý boıynsha Meta kompanııasynyń seriktesi atanǵany týraly habarlaǵan edik.

Osylaısha, Meta korporatsııasy Facebook, Instagram jáne Threads jelilerindegi dezınformatsııany áshkereleý úshin qazaqstandyq Factcheck.kz saıtyn vırýsty dezınformatsııa men jalǵan aqparatty anyqtaıtyn baǵdarlamasyna qosty.